Oes gen ti ddiddordeb mewn gweithio i chdi dy hun, ond angen syniad mawr?
Paid â phoeni! Gelli gymell dy hun mewn sawl ffordd i ddechrau meddwl yn greadigol.
Mae digon o syniadau busnes ar gael, ac mae llawer ohonynt yn dy ymennydd eisoes, heb yn wybod i chdi. Y cyfan y mae angen i ti ei wneud yw canfod ffordd o ddod o hyd iddynt.
Bydd y pwyntiau a ganlyn yn ddefnyddiol i chdi wrth i ti fynd i’r afael â’r dasg:
- Beth wyt ti’n fwynhau ei wneud, beth sy’n mynd â dy fryd?
- Fyddet ti’n medru troi’r diddordebau hyn neu unrhyw sgiliau arbennig wyt ti’n feddu arnynt mewn i fusnes?
- Gofynna i dy ffrindiau a dy deulu am syniadau. Efallai eu bod mewn swydd neu yrfa lle bo bwlch amlwg yn y farchnad.
- Meddylia am dy ardal leol. A fu angen cynnyrch neu wasanaeth arnat yn lleol erioed, nad oedd ar gael ar y pryd? Fyddet ti’n medru llenwi’r bwlch hwnnw yn y farchnad?
- Cymer gipolwg ar yr hyn yr wyt yn ei brynu. Elli di wella’r cynnyrch neu’r gwasanaeth mewn unrhyw ffordd?
- Beth am fynd i wneud rhywbeth - chwarae gêm, darllen llyfr, paentio llun, cymryd rhan mewn chwaraeon – gwna rhywbeth sy’n peri i chdi feddwl, ac yna sianelu’r egni hwnnw i greu syniad/cysyniad/cynnyrch.
Ysgrifenna dy syniadau ar bapur, waeth pa mor fawr neu fach a hyd yn oed os ydynt yn ymddangos yn ffôl i ddechrau.
Os oes gen ti yrfa mewn golwg, gwych, dwyt ti byth yn gwybod – efallai y byddi di’n ei droi mewn i fusnes dy hun un diwrnod?
Archwilia syniadau busnes naill i gychwyn un dy hun neu rai sy’n gweddu gyda dy uchelgeisiau gyrfaol drwy gofrestru ar gyfer ein Proffiliau Cyfle Busnes (Saesneg yn unig).
I ddysgu mwy am ddatblygu dy syniad busnes, darllena’r canllaw ar Ymchwil a Datblygu eich Syniad Busnes (gwefan Busnes Cymru).
Gall dyfeiswyr ieuengach rhwng 4 ac 16 oed ymweld â’r Oriel Syniadau ar wefan www.crackingideas.com i gael ysbrydoliaeth am dy syniad mawr. Gelli hefyd lawrlwytho pecynnau Gweithgarwch ac Arloesedd i ddysgu mwy am ddyfeisgarwch a chynnyrch arloesol. Ymuna â’r dyrfa a chymryd rhan yng Nghystadleuaeth Cracking Ideas (gwefan allanol) drwy gynnwys dy ddyfeisiad di.