Strategaeth a Gweithrediadau Busnes

Wrth ganfod risgiau a heriau posibl, ystyriwch wahanol senarios a pharatowch gynlluniau gweithredu i gynnal twf ac i ddarparu nwyddau a gwasanaethau cost-effeithiol

Mae llawer o ansicrwydd ynghylch beth yn union fydd Brexit yn ei olygu i fasnach. Ond, rywsut neu’i gilydd, bydd yn rhaid i fusnesau ddelio ag amgylchiadau newydd yn y blynyddoedd sydd i ddod. Bydd angen i gwmnïau weithio mewn ffordd strategol ar eu busnes a chynllunio ymlaen i sicrhau eu bod yn manteisio i’r eithaf ar y cyfleoedd ac yn lleihau’r risgiau a’r bregusrwydd sy’n deillio o Brexit. Bydd datblygu arweinyddiaeth a rheolaeth gadarn yn hanfodol er mwyn cael y weledigaeth a’r argyhoeddiad sy’n ofynnol i ganfod eich ffordd drwy’r dyfroedd newydd.

Bydd pob busnes yn wynebu gwahanol heriau a bydd cyfleoedd a bygythiadau Brexit yn unigryw i bob un ohonynt. Bydd paratoi nawr am yr hyn a allai fod o’ch blaen, ac ystyried goblygiadau Brexit ar gyfer gwahanol sefyllfaoedd yn helpu i sicrhau eich bod chi’n barod i weithredu ar unwaith ac addasu’n gyflym i sefyllfa sy’n newid. Gallai newid yn eich strategaeth fusnes gynnwys unrhyw beth o arallgyfeirio eich cadwyn gyflenwi, targedu marchnadoedd rhyngwladol newydd neu dorri tir newydd gyda’r hyn rydych chi’n ei gynnig er mwyn creu mantais gystadleuol.

Cyfleoedd a Heriau Posibl

Cynllunio ar gyfer risgiau ac ansicrwydd

Bydd nodi risgiau a dechrau paratoi cynlluniau wrth gefn nawr yn ei gwneud hi’n haws i chi roi cynlluniau ar waith pan fydd manylion y cytundeb terfynol ar gael. Dylai busnesau ystyried cael rhywun i fod yn gyfrifol am reoli hyn a’r effaith ar y sefydliad. Bydd hyn yn hanfodol er mwyn llywio’r busnes drwy gyfnod o ansicrwydd. Gallai perchennog y busnes ysgwyddo’r rôl hon os ydych chi’n fusnes bach. Mewn busnes mwy, gallai fod yn rôl i uwch reolwr neu weithiwr proffesiynol adnoddau dynol sydd ag awdurdod i wneud penderfyniadau ac sy’n adnabyddus yn y sefydliad.

Newid i gyfleoedd yn y farchnad

Gallai Brexit olygu marchnadoedd newydd ac amgen ar gyfer allforio mewn marchnadoedd rhyngwladol a/neu lai o gystadleuaeth ym marchnadoedd yr UE. Er mwyn paratoi ar gyfer y sefyllfa hon sy’n newid, dylech fonitro’r amgylchedd busnes a nodi'r cyfleoedd posibl i fanteisio i’r eithaf ar gyfleoedd ac arallgyfeirio marchnadoedd. Mae’n bwysig cael gwell dealltwriaeth o’ch cystadleuaeth ar hyn o bryd nawr a dechrau datblygu cynigion gwahanol neu gryfhau cynigion presennol a meddwl lle gallech chi leihau costau a gwellau arbedion effeithlonrwydd.

Gwella arbedion effeithlonrwydd

Gallai effaith bosibl Brexit ar y busnes olygu rhagor o bwysau ar faint yr elw. Gall cwmnïau ystyried arloesi, gwella arbedion effeithiolrwydd a lleihau costau eu prosesau cynhyrchu i wella arbedion effeithlonrwydd er mwyn cynnal neu hyd yn oed wella proffidioldeb. Dyma un o’r mesurau y gall busnes eu cymryd i gynllunio ar gyfer effeithiau heriol posibl Brexit, ond mae’n gwneud synnwyr busnes beth bynnag, heb ystyried Brexit.

Ystwythder y gadwyn gyflenwi

Yn dibynnu ar y cytundeb ar gyfer Brexit, bydd yn rhaid i fusnesau sicrhau eu bod yn gallu ymateb yn gyflym i unrhyw newidiadau mewn costau yn y gadwyn gyflenwi ac oedi posibl a allai effeithio ar lif cyflenwadau. Mae’n bosibl y bydd busnesau nad ydynt yn mewnforio’n uniongyrchol o’r UE yn gweld bod hyn wedi cael effaith niweidiol ar gyflenwyr allweddol. Mae’n bwysig deall unrhyw fregusrwydd posibl yn eich cadwyn gyflenwi er mwyn sicrhau na fydd unrhyw effaith ar eich gweithrediadau busnes. Archwiliwch gysylltiadau â chontractau cyflenwi er mwyn deall eich cyflenwyr yn well a nodi unrhyw feysydd allweddol a allai fod mewn perygl yn dilyn newidiadau Brexit. Nodwch opsiynau i gryfhau’r rhain neu ystyriwch arallgyfeirio cyflenwyr er mwyn lliniaru’r risgiau.

Mae Llywodraeth y DU wedi rhyddhau cyfres o hysbysiadau technegol sydd ar gael ar wefan GOV.UK yn cynnwys: