A lightbulb moment.Fflach bwlb golau. Dyna ddisgrifiad cydberchennog My Valley o’r arweiniad a’r cyngor a ddarparwyd gan Gyflymu Cymru i Fusnesau.
O agweddau fel cynllun marchnata manwl ar gyfer y flwyddyn i ddylunio gwefan a defnyddio Google AdWords, mae Cyflymu Cymru i Fusnesau a’r cynghorydd, Ian Dunkerley, wedi cael effaith gadarnhaol, nid lleiaf 15 y cant o gynnydd yn nifer y busnesau sy’n gwerthu trwy My Valley Limited – sef siop un stop ecogyfeillgar, ar-lein ar gyfer nwyddau cynaliadwy, moesegol, fegan, naturiol ac organig.
“Mae ei ddweud yn uchel nawr yn swnio braidd yn or-syml, ond cynllun cyffredinol ar gyfer y flwyddyn i ddod oedd un o’r eitemau y gofynnodd Ian i ni ei wneud. Daethom at ein gilydd ym mis Ionawr a chynllunio ein strategaeth farchnata o gwmpas dyddiadau allweddol fel Sul y Mamau, Sul y Tadau a Dydd Sant Ffolant,” meddai Wayne.
Hefyd, lansiwyd siop ar Ystâd Ddiwydiannol Aberaman, cam a oedd yn “gam nesaf naturiol” yn sgil ychydig o anogaeth gan Gyflymu Cymru i Fusnesau ac Ian.
Mae gan Wayne a’r cydberchennog, Tim Mealing, ddigon o synnwyr busnes, ill dau â chefndir mewn gwerthu a logisteg, ond yn achos My Valley, roedd angen arweiniad ar y ddau ar sut i gynyddu nifer y cwsmeriaid, cynyddu gwerthiannau a gwella marchnata digidol.
“A fyddem ni wedi gwneud hynny heb Gyflymu Cymru i Fusnesau? Na fyddem, mae’n siŵr. Fflach bwlb golau ydoedd.”
Syml, ond effeithiol. Ac roedd Cyflymu Cymru i Fusnesau ac Ian yn llawn cynghorion allweddol eraill ar gyfer My Valley, a lansiodd ym mis Ebrill 2021 ar ôl rhyw chwe mis o gynllunio.
Roedd Wayne wedi archwilio beth y gallai ei wneud o safbwynt busnes i helpu’r amgylchedd ond roedd y costau cysylltiedig wedi ei ddigalonni. Dim ond pan gyfarfu â Tim y penderfynodd y ddau sefydlu marchnadfa i bobl debyg, a oedd yn awyddus i brynu a gwerthu nwyddau ecogyfeillgar am bris rhesymol.
Yr hyn sy’n allweddol i gynllun busnes My Valley Limited yw nad oes ffioedd rhestru, gan olygu eich bod yn talu comisiwn rhesymol dim ond os yw eich nwyddau yn gwerthu, felly bach iawn o risg sydd ynghlwm.
O ran y gwelliannau penodol a awgrymodd Cyflymu Cymru i Fusnesau, esboniodd Wayne: “Edrychom ar bopeth o’n strategaeth farchnata fewnol i Google AdWords – sydd wedi codi ymwybyddiaeth o’r brand a chynyddu gwerthiannau ar-lein – optimeiddio peiriannau chwilio (SEO) a gwelliannau i’r wefan.
“Hefyd, fe wnaethom integreiddio ein marchnata drwy’r e-bost â’r wefan trwy ychwanegu botwm ‘galwad i weithredu’ i annog pobl i ymuno. Rydym wedi gweld y canlyniadau yn syth, gyda naid yn nifer y tanysgrifwyr i ryw 100.
“Mae cynnwys a fformatio’r cylchlythyr wedi gwella hefyd a dyna awgrym arall a gawsom. Mae golwg fwy croyw ar y cylchlythyr erbyn hyn ac mae’n arddangos beth rydym ni’n ei wneud fel cwmni yn well o lawer. Mae’r bobl sy’n ei gael wedi ymddiddori’n fwy o ran clicio drwodd i’r wefan.
“Hefyd, amlygwyd i ni’n gyflym fod angen i faint y lluniau ar ein gwefan fod yn gywir a bod angen disgrifiadau a phenawdau ar y lluniau hynny, er mwyn peidio â difetha profiad y defnyddiwr.
“Yn aml, roedd gwahaniaeth rhyngom ynghylch sut i hyrwyddo’r busnes, ond trwy weithio gyda Chyflymu Cymru i Fusnesau, daeth yn amlwg iawn fod angen i ni ei gwneud hi’n glir bod pobl yn gallu prynu a gwerthu ar y wefan.
“Hefyd, nid oedd gennym fotwm ‘Sell on My Valley’ ar frig yr hafan dudalen. Roedd pobl yn gorfod sgrolio i’r gwaelod cyn y byddent yn ei weld.
“Mae ei wneud yn fwy hygyrch wedi helpu, yn sicr. Mae tuag 20 o fusnesau gennym ar y safle ac mae rhyw 15 y cant wedi cyrraedd ers gwneud y newidiadau.
“Rydym yn newid ein hallweddeiriau yn rheolaidd i helpu gydag SEO ac mae hynny, ar y cyd â’r gwelliannau i’r wefan ac esblygiad y cylchlythyr, wedi cynyddu nifer yr ymwelwyr.”
Wrth edrych tua’r dyfodol, mae Wayne yn gobeithio cael cymorth pellach drwy offer mesur i helpu i sbarduno’r gweithgarwch marchnata fwy fyth.
Ychwanegodd: “Byddwn yn mynd ati i ddefnyddio Google Analytics yn fwy i’n helpu i ddilyn trywydd ymwelwyr, sylwi ar gynnydd a gallu treiddio i’r data er mwyn helpu i lywio gweithgarwch yn y dyfodol.”
Mae cyngor Cyflymu Cymru i Fusnesau wedi galluogi My Valley i ffynnu, ynghyd â galluogi Wayne a Tim i gynnig eu cymorth eu hunain ac ystyried ehangu’u hymerodraeth.
“Hefyd, rydym yn cynnig cymorth i bobl eraill a’u busnes – gan gynnwys un sy’n mewnforio nwyddau o Nepal – ac mae hynny’n fuddiol iawn.
“Mae effaith arweiniad Cyflymu Cymru i Fusnesau megis ton. Er mai’r prif nod oedd helpu ein brand i dyfu, dim ond cadarnhaol yw hi os yw eraill yn elwa hefyd.”