![Cows in a field in Barafundle Bay, Pembrokeshire](/responsible-business/sites/maingel2/files/styles/post_featured/public/images/Untitled%20%2836%29.png.webp?itok=iw4i_oTY)
Mark Drakeford AS, Prif Weinidog
Lesley Griffiths AS, y Gweinidog Materion Gwledig a Gogledd Cymru, a’r Trefnydd
Mae ffermio – ac amaethyddiaeth yn ehangach – yn chwarae rhan bwysig ym mywyd Cymru. Mae'n rhan o'n heconomi, ein hunaniaeth a'n diwylliant.
Mae Llywodraeth Cymru wedi ymrwymo i gefnogi dyfodol llwyddiannus i ffermio yng Nghymru. Rydym am gadw ffermwyr Cymru yn ffermio, wrth i ni fynd i'r afael â'r argyfwng hinsawdd a natur gyda’n gilydd.
Mae'r sector yn wynebu heriau sylweddol o ganlyniad i chwyddiant a chostau ynni cyson uchel, ansefydlogrwydd byd-eang, costau mewnbwn uchel a phrisiau cyfnewidiol wrth gât y fferm ynghyd â newid sylweddol yn y diwydiant.
Rydym yn parhau i wrando’n ofalus ar bryderon ffermwyr a’u hundebau, gan gynnwys y rheini am rai o bolisïau Llywodraeth Cymru. Gallwn gadarnhau heddiw (27 Chwefror 2024) ein bod yn cymryd y camau canlynol i helpu’r sector:
- TB Gwartheg a difa gwartheg ar y fferm: Rydym yn penodi Grŵp Cynghori Technegol TB Gwartheg, fel y cyhoeddwyd yn flaenorol ym mis Tachwedd. Ei flaenoriaeth cyntaf fydd edrych ar y polisi difa ar y fferm a rhoi cyngor i Weinidogion, fel mater o frys.
- Rheoliadau Adnoddau Dŵr (Rheoli Llygredd Amaethyddol) (Cymru): Rydym yn neilltuo £20m yn ychwanegol o arian i helpu ffermwyr i gydymffurfio â’r gofynion a byddwn yn lansio rownd newydd o’r Cynllun Buddsoddi mewn Rheoli Maethynnau cyn hir.
- Y Cynllun Ffermio Cynaliadwy: Rydym wedi bod yn cydweithio gyda ffermwyr dros y saith mlynedd diwethaf i ddylunio'r Cynllun Ffermio Cynaliadwy (SFS) – math newydd o gymorth i ffermwyr yng Nghymru i sicrhau'r cynhyrchiant bwyd a'r gwelliannau amgylcheddol sydd eu hangen ar Gymru i gadw ffermwyr ar eu tir am genedlaethau i ddod wrth i'r hinsawdd newid. Bydd yr SFS yn ein helpu i wireddu'r ymrwymiadau rydym wedi'u gwneud i bawb yng Nghymru, gan sicrhau dyfodol cryfach a gwyrddach i bob un ohonom a sicrhau bod ffermio cynaliadwy yn darparu manteision i’r cyhoedd yn gyfnewid am arian y cyhoedd. Daw'r ymgynghoriad presennol ar yr SFS i ben ar 7 Mawrth 2024.
I gael mwy o wybodaeth, cliciwch ar y ddolen ganlynol: Datganiad Ysgrifenedig: Ffermio yng Nghymru (27 Chwefror 2024) | LLYW.CYMRU