![businesspeople working together on a laptop](/responsible-business/sites/maingel2/files/styles/post_featured/public/images/shutterstock_2129744135.jpg.webp?itok=Ev5GZYqV)
Bob blwyddyn ar 18 Rhagfyr, mae’r byd yn nodi Diwrnod Rhyngwladol Mudwyr, sef diwrnod a gaiff ei neilltuo i gydnabod cyfraniad pwysig mudwyr, gan roi sylw ar yr un pryd i’r heriau y maent yn eu hwynebu.
Ni waeth beth fo’r rhesymau sy’n gorfodi pobl i symud, mae mudwyr a phobl sydd wedi’u dadleoli yn cynrychioli rhai o’r grwpiau mwyaf ymylol ac agored i niwed mewn cymdeithas. Yn aml, mae llawer o weithwyr mudol yn gweithio mewn swyddi dros dro, swyddi anffurfiol neu swyddi heb ddiogelwch, sy’n eu gwneud yn agored i fwy o risg o ansicrwydd, diswyddiadau, ac amodau gwaith gwael.
Er hyn, ceir prawf bod mudwyr yn annog ffyniant, arloesedd a datblygu cynaliadwy yn eu gwledydd tarddiad, mewn gwledydd tramwy, ac yn eu gwledydd lletyol. Mae eu gwybodaeth, eu rhwydweithiau a’u sgiliau wedi cyfrannu’n fawr at ddatblygiad cymunedau cryf. I gael rhagor o wybodaeth, dewiswch y ddolen ganlynol: International Migrants Day | United Nations
Mudwyr a Chyflogaeth
Mae Cymru wedi ymrwymo i ddod yn Genedl Noddfa, sef cenedl sy’n croesawu pobl sy’n ffoi rhag erledigaeth fel y gallant gael bywyd da, gweithio a ffynnu yn ein cymunedau ledled Cymru.
Mae cyfraddau cyflogaeth yn is ar gyfer mudwyr na llawer o gymunedau eraill yn y Deyrnas Unedig, ond nid ydym yn annog busnesau i gyflogi mudwyr ar sail tosturi neu garedigrwydd.
Mae mudwyr sy’n dod i Gymru, wrth ffoi rhag rhyfel neu erledigaeth, yn meddu ar dalentau nad ydynt yn cael eu defnyddio’n ddigonol yn y farchnad lafur yng Nghymru. Gall eich cwmni lenwi swyddi gwag a bylchau sgiliau, sicrhau mwy o amrywiaeth yn eich gweithlu a dod yn fwy cynhwysol fel sefydliad, gan gefnogi pobl sydd wedi ffoi o’u gwledydd cartref i ddechrau bywyd newydd yng Nghymru ar yr un pryd. I gael rhagor o wybodaeth, dewiswch y ddolen ganlynol: AilGychwyn | Recriwtio a Hyfforddi Busnes Cymru (gov.wales)