Dyma’r cwestiwn fydd yn cael ei ofyn mewn cyfres o gyfarfodydd sy’n cael eu trefnu ar draws Cymru yn ystod yr wythnosau nesaf gan Cyswllt Ffermio.
“Mae’r cyswllt cryf sy’n bodoli rhwng yr iaith Gymraeg ag amaeth yn gyfarwydd i lawer iawn ohonom ni, mae gan yr iaith Gymraeg bresenoldeb amlwg o fewn amaethyddiaeth,” meddai Eirwen Williams, Cyfarwyddwr yng nghwmni Menter a Busnes sy’n gyfrifol am drefnu’r digwyddiadau yma.
“Felly rydym am edrych i weld sut allwn ni adeiladu ar hyn, a chynyddu nifer y siaradwyr er mwyn cyrraedd y targed o filiwn o siaradwyr Cymraeg erbyn 2050. O’n profiad ni, mae digonedd o syniadau gan y diwydiant amaeth, felly rydyn ni’n awyddus i gasglu barn, ac mae angen i ni siarad â theuluoedd amaeth er mwyn dod o hyd i atebion.”
Bydd y cyfarfodydd yn cael eu rhedeg ar ffurf caseg eira, lle bydd y prif bwyntiau o’r cyfarfod cyntaf yn cael eu cario i’r cyfarfod nesaf, ac yn y blaen.
Ochr yn ochr â’r cyfarfodydd hyn bydd y ‘Bŵth Amaeth’ yn mynychu rhai o sioeau amaethyddol yr haf gan gynnwys y Sioe Fawr a’r Eisteddfod Genedlaethol lle bydd cyfle i bobl i fynd i mewn i’r Bŵth i gynnig eu syniadau. Bydd y sylwadau yn cael eu ffilmio a bydd yr holl ymatebion yn cael eu crynhoi a’u dadansoddi.
Os hoffech gael cyfarfod yn eich ardal chi, cysylltwch â Cyswllt Ffermio. Neu beth am alw i mewn i’r Bŵth Amaeth a fydd yn y Sioe Fawr a’r Eisteddfod Genedlaethol?
Am fwy o wybodaeth cysylltwch ag Eirwen Williams ar 01970 636295 / 07735439062 eirwen.williams@menterabusnes.co.uk
Cyllidwyd y prosiect hwn drwy Cymunedau Gwledig Llywodraeth Cymru - Rhaglen Datblygu Gwledig Cymru 2014-2020, a ariennir gan Lywodraeth Cymru a’r Gronfa Amaethyddol Ewrop ar gyfer Datblygu Gwledig.