Dyffryn Tywi : Tirwedd Hanes Ein Bro - Tywi Valley Historic Landscape

Nod y prosiect cydweithredol hwn, ar raddfa’r dirwedd gyfan, yw cyfuno ac integreiddio’r gwaith o reoli ardal arbennig yn Nyffryn Tywi, rhwng Caerfyrddin a Llandeilo, er budd bywyd gwyllt, treftadaeth a chymunedau’r ardal a hynny drwy gryfhau’r rhwydwaith o dirfeddianwyr, rheolwyr tir ac arbenigwyr. 

Bydd y prosiect yn galluogi tirfeddianwyr a rheolwyr i fanteisio ar wybodaeth a chyngor arbenigol i helpu i wella gwasanaethau ecosystemau a gwella’r dulliau o reoli’r dirwedd hanesyddol. Bydd angen cymryd camau i wella’r parcdir hanesyddol yng Ngerddi Botaneg Cenedlaethol Cymru a’i droi’n esiampl o system gynaliadwy o reoli adnoddau naturiol, sy’n agored i’r cyhoedd. Mae’r Gerddi a’r ardal gyfagos yn gyrchfan gwych ar gyfer amrywiaeth eang o weithgareddau hamdden, gan gynnwys cerdded, rhedeg, beicio, dringo coed, adeiladu cuddfannau, archaeoleg, garddwriaeth, arolygu ecolegol ac ymweld â ffermydd.

Mae’r prosiect hefyd yn cynnig cyfleoedd i hybu iechyd fel gweithio gyda Down To Earth, menter gymdeithasol lwyddiannus, sy’n helpu pobl i newid eu bywydau er gwell drwy gymryd rhan mewn gweithgareddau awyr agored ystyrlon. Mae’r fenter yn canolbwyntio’n benodol ar bobl agored i niwed sydd â chyflyrau iechyd meddwl ac anafiadau sydd wedi creu trawma ymenyddol.