Partneriaeth Dyffryn Tywi - Dysgu oddi wrth y Tir

Bydd Partneriaeth Dyffryn Tywi yn defnyddio System Gwybodaeth Ddaearyddol (GIS) i gefnogi'r broses o 'gipio' gwybodaeth leol, gan greu llwyfan ddigidol un-stop a fydd yn gwella mynediad at wybodaeth sydd â ffocws lleol am adnoddau naturiol a diwylliannol. Nid yn unig y bydd y gwaith hwn yn cefnogi'r darparwyr twristiaeth yn y bartneriaeth bresennol, ond bydd hefyd o fudd i weithredwyr twristiaeth y sector preifat yn ardal y prosiect.

Trwy fapio asedau naturiol a diwylliannol rhannau canol Dyffryn Tywi, bydd y prosiect yn hybu ymwybyddiaeth, dealltwriaeth a mwynhad o adnoddau naturiol a diwylliannol yr ardal ac, o ganlyniad, yn codi proffil Sir Gaerfyrddin ymhlith cynulleidfaoedd newydd a chyfredol. Bydd yn cefnogi gwasanaethau diwylliannol gan gyfrannu at ganlyniadau iechyd a llesiant, hamdden a thwristiaeth, yn cynyddu gweithgarwch yn yr awyr agored, ac yn cynorthwyo i gynyddu nifer yr ymwelwyr a'r amser y maent yn aros yn yr ardal, a hynny i gefnogi datblygiad economaidd ymhlith busnesau twristiaeth yr ardal.