Mae Llywodraeth Cymru wedi sicrhau bod grantiau o rhwng £10,000 a £100,000 ar gael i sefydliadau gwirfoddol sy’n darparu cymorth hanfodol i gymunedau yn ystod yr argyfwng coronafeirws.
Bwriad Cronfa Argyfwng y Gwasanaethau Gwirfoddol yw sicrhau bod gan sefydliadau'r adnoddau sydd eu hangen arnynt i gynnal, cynyddu ac addasu gweithgareddau sy’n cefnogi pobl fregus a difreintiedig yn eu cymunedau, fel:
- pobl sy’n ynysu
- pobl oedrannus
- gofalwyr
- pobl sy’n cael anhawster cael gafael ar fwyd
Gellir defnyddio cyllid ar gyfer gwariant cyfalaf neu refeniw llai, e.e. cyfarpar diogelu personol, ond mae’n rhaid i’r cais gydymffurfio â nodau’r grant neu gynyddu’r gwasanaethau gwirfoddol sydd ar gael ar gyfer unigolion bregus a chymunedau sy’n cael eu heffeithio gan coronafeirws.
Yn y lle cyntaf, bydd y cyllid ar gael am hyd at chwe mis a gellir cyflwyno ceisiadau ar unrhyw adeg.
Am ragor o wybodaeth, ewch i wefan Cyngor Gweithredu Gwirfoddol Cymru.