Busnes Cymru yn cefnogi cwmni teithiau beicio mynydd tywysedig yng ngogledd Cymru.
Crynodeb gweithredol
Sefydlwyd Ride Guide Cymru gan Trystan Rowlands i ddarparu teithiau beicio mynydd tywysedig a phenwythnosau i ffwrdd unigryw yng ngogledd Cymru. Cysylltodd â gwasanaeth cymorth blaenllaw Llywodraeth Cymru, Busnes Cymru, am gymorth a chyngor ynglŷn â sut i gychwyn arni.
- dechrau llwyddiannus
- creu 1 swydd
- gweithdai a chymorth ymgynghorol un-i-un
Cyflwyniad i'r busnes
Wedi'i sefydlu gan Trystan Rowlands yng ngogledd Cymru, mae Ride Guide Cymru yn cynnig profiadau beicio mynydd tywysedig, unigryw, gan arbenigo mewn penwythnosau holl gynhwysol yn Eryri a Bryniau Clwyd.
Pam wnaethoch chi benderfynu dechrau eich busnes eich hun?
Penderfynais ddechrau fy musnes fy hun gan fy mod eisiau troi fy niddordeb yn rhywbeth y gallai pobl eraill ei fwynhau. Rwyf hefyd yn mwynhau datblygu pobl drwy drosglwyddo gwybodaeth iddynt o ran llwybrau, sgiliau a thechnegau beicio.
Rwyf wedi bod yn mynd â phobl allan ar eu beiciau ers blynyddoedd a phenderfynais gymhwyso fel arweinydd beicio mynydd (MTB), fel y gallwn ddechrau trefnu teithiau tywysedig i grwpiau lleol yng ngogledd Cymru. Tyfodd y mathau hyn o deithiau'n raddol nes i mi gael pobl yn dechrau cysylltu â mi yn holi a fyddwn yn gallu trefnu penwythnosau preifat yng ngogledd Cymru. Arweiniodd hyn yn y pen draw ataf yn dechrau fy musnes fy hun.
Mae'n ddyddiau cynnar, ond byddwn yn hoffi ei adeiladu'n raddol dros y blynyddoedd nesaf. Ar hyn o bryd, rydym yn cynnig 4 penwythnos tywysedig holl gynhwysol ar gyfer 2020 gyda thri o'r rhain wedi gwerthu allan. Bydd hyn yn cynyddu i 6-8 taith yn 2021 a hyd at 10 yn 2022.
Pa heriau a wyneboch?
Rwyf wedi wynebu sawl her ar hyd y daith ond y brif un yw sut mae targedu pobl ar y cyfryngau cymdeithasol yn ogystal â llunio cynllun busnes a rhagolygon llif arian.
Cymorth Busnes Cymru
Mynychodd Trystan weithdy Dechrau a Rhedeg Busnes, gan Busnes Cymru, ac yna cafodd gefnogaeth gan Lowri Roberts, Ymgynghorydd Busnes, a helpodd gyda phob agwedd ar ddechrau busnes, gan gynnwys cynllunio busnes ac arian, yn ogystal â marchnata a'r cyfryngau cymdeithasol, gan alluogi Trystan i lansio ei deithiau beicio mynydd tywysedig, gan greu 1 swydd.
Canlyniadau
- dechrau llwyddiannus
- creu 1 swydd
- gweithdai a chymorth ymgynghorol un-i-un
Mae Lowri [fy ymgynghorydd] wedi bod yn help mawr gyda'r heriau uchod. Mae wedi rhoi cyngor gwych i mi ynglŷn â sut i gyfathrebu â darpar gwsmeriaid ar y cyfryngau cymdeithasol a sut i gynnig cynlluniau talu fforddiadwy iddynt am y teithiau a gynigwn. Mae hefyd wedi fy nghyfeirio at gwrs ar y cyfryngau cymdeithasol wedi'i ariannu'n llawn gyda Busnes Cymru, y byddaf yn ei fynychu ym mis Mawrth. Bydd hyn gobeithio, yn rhoi mwy o ddealltwriaeth i mi ynglŷn â sut i ryngweithio â phobl ar lwyfannau cyfryngau cymdeithasol.
Cynlluniau a dyheadau ar gyfer y dyfodol
Mae fy nghynlluniau yn cynnwys ehangu'r nifer o deithiau a gynigwn ar gyfer 2021 a thu hwnt, yn ogystal â hyfforddi a chyflogi tywyswyr ac arweinwyr beicio mynydd tymhorol ar gyfer y teithiau hyn. Yn y dyfodol, hoffwn gynnig cyrsiau hyfforddi ar gyfer beicwyr mynydd fel rhan o'n teithiau.
Os hoffech ddarllen rhagor o straeon llwyddiant am sut mae Busnes Cymru wedi helpu pobl eraill fel chithau i ddechrau neu dyfu eu busnesau, ewch i https://businesswales.gov.wales/cy/astudiaethau-achos neu dilynwch @_businesswales / @_busnescymru ar Twitter.