Mae'n rhaid i fusnesau sy'n cyflwyno datganiadau mewnforio ddefnyddio'r Gwasanaeth Datganiadau Tollau o 1 Hydref 2022, pan fydd y system Tollau ar gyfer Trin Nwyddau a Gaiff eu Mewnforio a’u Hallforio (CHIEF) yn cau ar gyfer datganiadau mewnforio.
Dylai busnesau wirio bod eu hasiantau tollau yn barod i ddefnyddio'r Gwasanaeth Datganiadau Tollau. Rhaid i'r rheiny sydd heb asiant tollau drefnu gwneud eu datganiadau eu hunain gan ddefnyddio meddalwedd sy'n gweithio gyda'r system.
Gall gymryd sawl wythnos i gael eu sefydlu'n llawn ar y Gwasanaeth Datganiadau Tollau, felly mae’r rheiny sy'n aros i gofrestru mewn perygl o beidio â gallu mewnforio nwyddau i'r DU o 1 Hydref 2022.
Er mwyn helpu pob busnes ac asiant i baratoi ar gyfer y Gwasanaeth Datganiadau Tollau, cysylltir â datganwyr dros y ffôn a thrwy e-bost i'w hysbysu am y camau y mae angen iddynt eu cymryd. Mae mwy o wybodaeth ar gael am GOV.UK, gan gynnwys pecyn gwybodaeth a rhestrau gwirio y Gwasanaeth Datganiadau Tollau, sy'n dadansoddi'r camau y mae angen i fasnachwyr eu cymryd.
Gall masnachwyr hefyd gofrestru neu wirio bod ganddynt fynediad at y Gwasanaeth Datganiadau Tollau ar GOV.UK a chyrchu gwasanaethau cymorth cwsmeriaid byw i gael help ychwanegol.
Ar ôl cofrestru, bydd angen i fusnesau sy'n defnyddio Cyfrif Gohirio Tollau sefydlu Cyfarwyddyd Debyd Uniongyrchol newydd ar gyfer y Gwasanaeth Datganiadau Tollau erbyn 30 Medi 2022. Os na fydd hyn yn cael ei sefydlu, ni fydd modd defnyddio'r Cyfrif Gohirio Tollau mwyach, a bydd angen gwneud taliadau unigol ar unwaith bob tro y gwneir datganiad mewnforio.
Fe fydd CHIEF yn cau ar gyfer datganiadau allforio ar 31 Mawrth 2023, a bydd yn ofynnol i fusnesau ddefnyddio'r Gwasanaeth Datganiadau Tollau i anfon nwyddau allan o'r DU.