Partneriaeth newydd rhwng Llywodraeth Cymru ac OpenAI i wella ChatGPT yn Gymraeg.
Fel rhan o’r ymdrech i gynyddu’r defnydd dyddiol o’r Gymraeg, mae Llywodraeth Cymru wedi cyhoeddi partneriaeth ddata newydd gydag OpenAI i wella sut mae technoleg AI yn gweithio yn Gymraeg.
Yn y Senedd yn ddiweddarach heddiw bydd Ysgrifennydd y Cabinet dros yr Economi, Ynni a’r Gymraeg, Jeremy Miles, yn amlinellu ei flaenoriaethau ar gyfer y Gymraeg, gyda thechnoleg yn llinyn arian yn rhedeg ar draws bob un.
Mae ei flaenoriaethau’n cynnwys:
- cyhoeddi Bil Addysg Gymraeg yn ystod yr wythnosau nesaf a fydd yn galluogi pob disgybl ysgol yng Nghymru i ddod yn siaradwyr Cymraeg annibynnol a hyderus;
- cefnogi datblygiad economaidd mewn cymunedau sydd â dwysedd uchel o siaradwyr Cymraeg i sicrhau bod yr iaith yn ffynnu ochr yn ochr â thwf economaidd;
- creu cyfleoedd i siarad a mwynhau yn y Gymraeg drwy gynyddu trosglwyddiad iaith yn y cartref ac o fewn cymunedau.
Bydd y bartneriaeth yn creu archifau data agored i gyfrannu data i'r gymuned ymchwil, er mwyn gwella perfformiad ieithyddol modelau a chydrannau AI.
Ers i Lywodraeth Cymru gyhoeddi’r Cynllun gweithredu technoleg Cymraeg yn 2018, mae wedi ariannu, creu a gweithio ar nifer o’r elfennau digidol angenrheidiol i’r iaith.
Gall pobl gyflwyno gwybodaeth ar wefan Llywodraeth Cymru: Technoleg a’r Gymraeg: alwad am wybodaeth | LLYW.CYMRU. Yn ogystal â hyn, bydd y llywodraeth hefyd yn siarad â phobl ledled Cymru a thu hwnt, i gael eu mewnbwn i waith ar gyfer technoleg iaith Gymraeg yn y dyfodol.