Eluned Morgan AS, y Gweinidog Iechyd a Gwasanaethau Cymdeithasol
Heddiw (7 Chwefror 2024), yn rhan o'i adolygiad diweddaraf ar raglen frechu COVID-19, mae'r Cyd-bwyllgor ar Imiwneiddio a Brechu wedi cyhoeddi datganiad sy'n argymell brechiad atgyfnerthu y gwanwyn ar gyfer y bobl hynny y mae'n ystyried y byddent yn elwa fwyaf ar gael eu brechu.
Prif nod rhaglen frechu COVID-19 o hyd yw atal clefydau difrifol (sy'n arwain at orfod mynd i'r ysbyty a marwolaethau) yn sgil COVID-19. Fel strategaeth ragofalus, mae'r Cyd-bwyllgor wedi argymell y dylai'r bobl a ganlyn gael dos atgyfnerthu yn y gwanwyn:
- oedolion 75 oed a throsodd;
- pobl sy’n byw mewn cartref gofal i oedolion hŷn, ac
- unigolion 6 mis oed a throsodd sy'n imiwnoataledig (fel y'i diffinnir yn nhabl 3 neu 4 yn y Llyfr Gwyrdd).
I gael rhagor o wybodaeth, dewiswch y ddolen ganlynol: Datganiad Ysgrifenedig: Cynnig brechiad atgyfnerthu COVID-19 y gwanwyn i'r rhai yr ystyrir y byddent yn elwa fwyaf ar gael eu brechu (7 Chwefror 2024) | LLYW.CYMRU