Mae Llywodraeth Cymru a Chanolfan Rheoli Darbodus Toyota, Glannau Dyfrdwy, wedi cydweithio i gynnig cyfle unigryw i fusnesau yng Nghymru i sicrhau gwelliannau cynaliadwy mewn cystadleurwydd.
Nod y rhaglen yw cyflwyno gwelliannau mesuradwy o ran cynhyrchiant, drwy rannu a darparu hyfforddiant mewn egwyddorion rheoli darbodus.
Bydd ymarferwyr Toyota profiadol yn darparu cymysgedd o'r canlynol i’r rhai sy’n cymryd rhan:
- Theori ystafell ddosbarth.
- Arsylwi manwl ar lawr y siop.
- Enghreifftiau o ddefnydd ymarferol wedi'u cyflwyno yng nghyfleuster injan Toyota ar Lannau Dyfrdwy.
- Hyfforddiant ar safleoedd gwaith cwmnïau sy'n cymryd rhan i gefnogi gwelliannau o ran cynhyrchiant.
Mae Rhaglen Clystyrau Darbodus Toyota yn cynnwys tair elfen annibynnol:
- Cyflwyniad – I gwmnïau sy'n newydd i'r cysyniad darbodus (‘lean’), cyflwyniad i egwyddorion darbodus a Dull Toyota drwy sesiynau blasu 1 diwrnod a gynhelir ar Lannau Dyfrdwy. Gyda 50% o gymorth gan Lywodraeth Cymru, bydd y sesiynau hyn yn costio £190 y pen heb TAW.
- Cychwyn Darbodus – Rhaglen hybrid ar gyfer cwmnïau sy'n barod i newid sy'n cynnwys 3 diwrnod o hyfforddiant yn Toyota Glannau Dyfrdwy ynghyd â 5 diwrnod o gymorth prosiect ymarferol gan hyfforddwr Toyota ar safle eich cwmni eich hun. Ar ôl 75% o gymorth gan Lywodraeth Cymru, y gost fesul cwmni i hyd at 3 chynrychiolydd yw £1,703.33 heb TAW.
- Darbodus Plws – Mae Darbodus Plws yn darparu 10 diwrnod o gymorth i gwmni gan hyfforddwr Toyota a fydd yn helpu i gychwyn ac arwain prosiectau darbodus mwy trawsnewidiol. Gyda 50% o gymorth gan Lywodraeth Cymru, cost Darbodus Plws yw £3,180 fesul cwmni heb TAW.
Rhwydweithiau Darbodus
Bydd y rhaglen yn cefnogi Rhwydwaith Darbodus gan roi cyfle i’r rhai sy’n cymryd rhan greu cysylltiadau, ymgysylltu a dysgu oddi wrth ei gilydd.
Os oes gennych ddiddordeb mewn cymryd rhan yn Rhaglen Clystyrau Darbodus Toyota Llywodraeth Cymru cysylltwch â TLMP@gov.wales
Am fwy o wybodaeth ar egwyddorion darbodus a Dull Toyota, ewch i weld ein gwefan a'n tudalen adnoddau: