Mae rhaglen Sgiliau Bwyd a Diod Cymru Llywodraeth Cymru (y rhaglen) wedi ymuno ag Expoverse Wales - yr expo gyrfaoedd rhithwir trochol - i daflu goleuni ar y cyfoeth o gyfleoedd gyrfa cyffrous ar draws diwydiant bwyd a diod ffyniannus Cymru.
Wedi'i ddatblygu gan arloeswyr digidol One Step North, mae Expoverse Wales yn blatfform digidol rhyngweithiol a gynlluniwyd i gysylltu busnesau, addysgwyr a dysgwyr o fewn amgylchedd 360 gradd. Mae'r expo wedi'i gysylltu'n uniongyrchol â'r platfform Careers in 360, safle archwilio gyrfaoedd am ddim sy'n caniatáu i ddefnyddwyr ddarganfod dros 550 o rolau swyddi ar draws gwahanol sectorau yng Nghymru.
Mae’r profiad Expoverse Cymru y cyntaf o'i fath, gan roi cyfle i wylwyr archwilio ac ymweld â busnesau a sefydliadau Cymru yn rhithwir ar draws pum neuadd sector bwrpasol. Mae pob neuadd yn arddangos 10 cwmni blaenllaw, gan ddarparu ffenestr 24/7, 365 diwrnod i economi Cymru.
Fel 'arddangoswyr' yn y Neuadd Bwyd a Diod, mae rhaglen Sgiliau Bwyd a Diod Cymru Llywodraeth Cymru yn rhannu'r gofod rhithwir gydag arweinwyr yn y diwydiant gan gynnwys Dunbia, Castell Howell, Hilltop Food Group, Cambrian Training, Prifysgol Cymru Y Drindod Dewi Sant, Radnor, In the Welsh Wind, Evan Evans, a Brace’s - gan roi digon o amrywiaeth a dewisiadau gyrfa i wylwyr eu harchwilio.
Mae Expoverse Wales yn darparu gofod digidol arloesol lle mae diwydiannau'n dod yn fyw yn rhithwir. Mae'r platfform yn rhoi ffordd ddeniadol i sefydliadau gyflwyno cyfleoedd byd go iawn a chysylltu â phobl o bob oed.
Dywedodd Stuart Toomey, Rheolwr Gyfarwyddwr (Cymru) o One Step North, Careers in 360:
"Mae dewis llwybr gyrfa yn benderfyniad anodd a brawychus i rai. Ond trwy elfennau rhyngweithiol fel ymgysylltu â chyflogwyr rhithwir a chyfleoedd profiad gwaith, mae Expoverse Wales yn grymuso defnyddwyr i reoli eu taith gyrfa.
Gall unigolion ymgolli mewn amgylcheddau gwaith amrywiol, gan feithrin dealltwriaeth ddyfnach o opsiynau gyrfa a disgwyliadau'r diwydiant."
Trwy ei chyfranogiad, bydd y rhaglen yn defnyddio'r platfform i amlygu'r llwybrau gyrfa, sgiliau a chyfleoedd hyfforddi amrywiol sydd ar gael ar draws y sector - o rolau cynhyrchu bwyd a chynaliadwyedd i arloesi, technoleg, logisteg a mwy.
Dywedodd Kate Rees, Rheolwr rhaglen Sgiliau Bwyd a Diod Cymru Llywodraeth Cymru:
"Mae ein cydweithrediad ag Expoverse Wales yn caniatáu inni gyrraedd dysgwyr, ceiswyr gwaith ac addysgwyr mewn ffordd hollol newydd. Mae'n adnodd pwerus ar gyfer codi ymwybyddiaeth o'r cyfleoedd o fewn diwydiant bwyd a diod Cymru, gan ein helpu i ysbrydoli talent y dyfodol a chefnogi twf y diwydiant."
Wedi'i ddatblygu mewn cydweithrediad â sefydliadau allweddol yn y sector cyhoeddus gan gynnwys prifysgolion, colegau ac ysgolion ledled Cymru, dyma'r adnodd dwyieithog rhad ac am ddim cyntaf o'i fath yng Nghymru. Er mai dim ond yn ddiweddar y cafodd y platfform ei lansio, mae eisoes wedi cael dros 5000 o ymwelwyr unigryw.
Mae cael presenoldeb ar yr adnodd newydd cyffrous hwn yn rhan o ymrwymiad parhaus y rhaglen i gryfhau sgiliau, cefnogi busnesau a sicrhau bod diwydiant bwyd a diod Cymru yn parhau i dyfu, arloesi a ffynnu.