Mae Cymru unwaith eto wedi mwynhau lle canolog yn y sîn bwyd a diod fyd-eang yn dilyn presenoldeb llwyddiannus diweddar yn Foodex Japan 2026, yn y Tokyo Big Sight.
Mae Foodex Japan yn un o arddangosfeydd bwyd a diod mwyaf a mwyaf dylanwadol Asia, ac yn denu mwy na 70,000 o brynwyr, dosbarthwyr, manwerthwyr ac arweinwyr gwasanaethau bwyd o bob cwr o Japan. Mae'r digwyddiad yn llwyfan heb ei ail i gynhyrchwyr arddangos arloesedd, cryfhau perthnasoedd masnachol a datgloi cyfleoedd allforio newydd.
Gyda chefnogaeth Llywodraeth Cymru, eleni, cynrychiolwyd Cymru gan Hybu Cig Cymru – (HCC) a Golden Road Gin, ynghyd â dau fewnforiwr angerddol o Japan sy'n parhau i hyrwyddo cynnyrch Cymru ledled y wlad: Mint & Co, a Hobgoblin, gyda Mineichi a Beau 7 Bon yn ddigon caredig i gyfrannu cynhyrchion i'w harddangos drwy gydol y sioe. Sefydlwyd y perthnasoedd hyn yn Blas Cymru / Taste Wales, digwyddiad masnach bwyd a diod rhyngwladol dwyflynyddol Llywodraeth Cymru.
Wrth fyfyrio ar y cydweithio cryf, dywedodd Dirprwy Brif Weinidog Llywodraeth Cymru ac Ysgrifennydd y Cabinet dros Newid Hinsawdd a Materion Gwledig, Huw Irranca‑Davies AS:
“Mae gan Gymru stori eithriadol i’w hadrodd am fwyd a diod, ac mae digwyddiadau fel Foodex Japan yn caniatáu inni arddangos y gorau o’n cynhyrchwyr ar blatfform gwirioneddol fyd-eang. Mae’n ysbrydoledig gweld partneriaethau a wnaed yn Blas Cymru / Taste Wales bellach yn ffynnu’n rhyngwladol, gyda busnesau Cymru a mewnforwyr Japaneaidd yn gweithio law yn llaw i ddod â chynhyrchion Cymreig o ansawdd uchel i farchnadoedd newydd. Rwy’n ddiolchgar i’r holl gynhyrchwyr, cogyddion a phartneriaid a gynrychiolodd Cymru mor wych yn Tokyo, ac rwy’n edrych ymlaen at weld y cyfleoedd allforio hyn yn parhau i dyfu.”
Ymhlith y brandiau Cymreig a arddangoswyd roedd Welsh Lady Preserves, Barti, Radnor Preserves, Gower Gin, Cradoc’s, Da Mhile, Wrexham Lager a Mydflower, sy’n cynrychioli amrywiaeth a chrefftwaith sector bwyd a diod Cymru sy’n ehangu.
Cafodd ymwelwyr â stondin Cymru fwynhau rhaglen goginio ddeinamig dan arweiniad Colin Gray a Nia Evans o Gymdeithas Goginio Cymru, a ddarparodd arddangosiadau coginio byw drwy gydol yr wythnos. Roedd eu bwydlen yn tynnu sylw at hyblygrwydd cynhwysion Cymru, gyda sawl pryd yn cynnwys tro coginio Japaneaidd, fel Caws Pob Cymreig gyda Chaws Cheddar Aeddfed Calon Wen, Cig Oen Cymru PGI gyda sglein soi gludiog, eog wedi'i halltu â Halen Môn, coes Cig Oen Cymru PGI wedi'i sgleinio â Miso, asennau Cig Oen Cymru PGI barbeciw, a Phice ar y Maen Tan y Castell gyda hufen tolch Daffodil a chompot mafon.
Roedd y cogyddion hefyd yn Japan i hyrwyddo Cyngres ac Arddangosfa Worldchefs 2026, a gynhelir yng Nghymru am y tro cyntaf erioed yn ICCW, Casnewydd, o 16–19 Mai 2026.
I gynhyrchwyr Cymru, roedd Foodex yn gyfle pwysig i gwrdd â dosbarthwyr a manwerthwyr o bob cwr o Japan. Wrth fyfyrio ar eu hymweliad, dywedodd Phillip Wheeler, Sylfaenydd Golden Road Gin:
“Roedden ni wrth ein bodd i fod yn rhan o’r ddirprwyaeth Gymreig yn Foodex Japan. Fel Ymwelydd Allforio, roedd yn bwysig i ni fod yno’n bersonol, i asesu’r farchnad yn iawn, cwrdd â dosbarthwyr wyneb yn wyneb, a deall a oes cyfle gwirioneddol i Golden Road Gin yma. Bu’n brofiad gwych, gan roi mewnwelediad gwerthfawr i ni a’r cyfle i gyflwyno’r jin yn uniongyrchol i brynwyr Japaneaidd. Mae’r gefnogaeth gan Lywodraeth Cymru wedi bod yn wych, ac mae wedi ein cyffroi ynghylch y potensial ar gyfer gwirodydd Cymreig premiwm yn Japan.”
Cyn yr arddangosfa, cymerodd cwmnïau o Gymru ran hefyd mewn digwyddiad cwrdd â’r prynwyr a drefnwyd ymlaen llaw ac a gynhaliwyd yn Llysgenhadaeth Prydain, gan alluogi trafodaethau strwythuredig gyda phartneriaid allweddol. Croesawodd mewnforwyr Japan y cydweithrediad parhaus.
Dywedodd Mark Spencer o Hobgoblin, sy'n mewnforio amrywiaeth o gynhyrchion Cymreig i'r farchnad Japaneaidd:
“Cawsom ein gwahodd i ymuno â stondin Cymru yn Foodex yn fuan ar ôl i ni ddechrau mewnforio cynhyrchion Cymreig i Japan. Rhaid i mi ddweud bod y profiad, o'r dechrau i'r diwedd, yn broffesiynol ac yn hynod gefnogol. Rhoddodd blatfform rhagorol inni hyrwyddo a chyflwyno'r cynhyrchion hyn i'r farchnad Japaneaidd. Byddwn wrth fy modd yn cymryd rhan eto pe bawn yn cael gwahoddiad.”
Ymunodd y ddirprwyaeth o Gymru hefyd â Derbyniad y Pedair Gwlad yn Llysgenhadaeth Prydain yn Tokyo ar drothwy Foodex, lle mwynhaodd gwesteion Gig Oen Cymru PGI ochr yn ochr â detholiad arbennig o ddiodydd Cymreig. Atgyfnerthodd y derbyniad y cysylltiadau diwylliannol a masnachol cryf rhwng gwledydd y DU a Japan, gan greu cyfleoedd gwerthfawr i rwydweithio ac ymgysylltu ymhellach â'r farchnad.