Bydd diwydiant gwin ffyniannus Cymru yn cael lle canolog yr haf hwn wrth i Wythnos Gwin Cymru ddychwelyd o 29 Mai i 7 Mehefin 2026, gan ddod â gwinllannoedd, gwneuthurwyr gwin a chynhyrchwyr ynghyd i arddangos ansawdd, amrywiaeth ac enw da cynyddol gwin Cymru.
Bellach wedi’i sefydlu'n gadarn fel cyfnod allweddol yn y calendr, mae Wythnos Gwin Cymru yn rhoi sylw i’r bobl, y lleoedd a'r prosesau y tu ôl i win Cymru, gan gynnig llwyfan cenedlaethol i hyrwyddo'r sector a'i gynnydd parhaus.
Mae sector gwin Cymru wedi gweld twf sylweddol yn ystod y blynyddoedd diwethaf, gan esblygu i fod yn rhan ddeinamig ac uchelgeisiol o dirwedd bwyd a diod y DU. Bellach mae mwy na 60 o winllannoedd ledled Cymru, yn tyfu amrywiaeth o fathau o rawnwin ac yn cynhyrchu gwinoedd llonydd a phefriog o ansawdd uchel sy'n ennill cydnabyddiaeth gynyddol yn y DU ac yn rhyngwladol.
Wrth fyfyrio ar dwf ac uchelgais y sector ar draws y diwydiant, dywedodd Andy Mounsey, Cadeirydd Gwin Cymru, sy'n cynrychioli gwinllannoedd a chynhyrchwyr gwin Cymru:
“Mae cynhyrchu gwin yng Nghymru wedi cynyddu'n sylweddol, gyda thwf cryf ac mae gwinllannoedd newydd yn parhau i ddod i'r amlwg. Mae cynlluniau uchelgeisiol y diwydiant yn ceisio cynyddu gwerth sector gwin Cymru i £100 miliwn erbyn 2035.
“Yr hyn sy'n arbennig o gyffrous yw'r gwelliant cyson mewn ansawdd, wedi'i yrru gan ddealltwriaeth ddyfnach o'n gwinllannoedd, y ffrwythau maen nhw'n eu cynhyrchu a'r amodau unigryw sydd gennym ni yma yng Nghymru. Mae hyn yn galluogi gwneuthurwyr gwin i greu gwinoedd premiwm nodedig sy'n cael eu cydnabod fwyfwy ar lwyfan cenedlaethol a rhyngwladol.
“Mae Wythnos Gwin Cymru yn gyfle pwysig i ddathlu'r cynnydd hwnnw — gan ddod â chynhyrchwyr, busnesau a defnyddwyr ynghyd i ddarganfod mwy am win Cymru a'r diwydiant y tu ôl iddo.”
Mae'r momentwm hwn yn cael ei gefnogi gan Strategaeth Gwin Cymru dan arweiniad y diwydiant, a ddatblygwyd mewn cydweithrediad â Chlwstwr Diodydd Llywodraeth Cymru, sy'n canolbwyntio ar gynaliadwyedd, datblygu sgiliau a chryfhau safle Cymru fel cynhyrchydd gwinoedd premiwm, nodedig.
Mae cynhyrchwyr Cymru eisoes yn ennill cydnabyddiaeth fyd-eang, gyda gwinoedd yn sicrhau gwobrau mewn cystadlaethau blaenllaw gan gynnwys Gwobrau Gwin y Byd Decanter a'r Her Gwin Ryngwladol, gan ddangos ansawdd a photensial y sector ymhellach.
Drwy gydol Wythnos Gwin Cymru, bydd gwinllannoedd a chynhyrchwyr ledled Cymru hefyd yn cynnal rhaglen o ddigwyddiadau gan gynnwys sesiynau blasu, teithiau a phrofiadau cwrdd â'r gwneuthurwr, gan gynnig cyfleoedd i ymwelwyr ymgysylltu'n uniongyrchol â'r bobl y tu ôl i'r gwinoedd.
I winllannoedd, mae'r wythnos yn cynnig llwyfan gwerthfawr i rannu eu straeon, arddangos eu gwinoedd a chysylltu â chynulleidfaoedd newydd. Dywedodd Gwen Davies o Winllan y Dyffryn: “Mae Wythnos Gwin Cymru yn gyfle gwych i arddangos ansawdd ac unigoliaeth gwinoedd Cymru ac i rannu'r stori y tu ôl i'r hyn a wnawn. Mae'n tynnu sylw at y gofal a'r arbenigedd sy'n mynd i mewn i dyfu'r grawnwin a chynhyrchu'r gwinoedd, gan ddod â chydnabyddiaeth ehangach i'r sector cyfan.”
Wrth i’r sector barhau i dyfu, mae gweithgareddau fel Wythnos Gwin Cymru hefyd yn chwarae rhan gynorthwyol wrth annog ymwelwyr i grwydro gwinllannoedd ledled Cymru, gan gyfrannu at economïau lleol ac arddangos yr arlwy bwyd a diod ehangach. Dywedodd Gweinidog Cabinet dros Wydnwch Gwledig a Chynaliadwyedd, Llyr Gruffydd: “Rydym am i’r sector bwyd a diod yng Nghymru gael hunaniaeth Gymreig gref – gan ddangos y gorau o’r hyn y gall y wlad hon ei gynhyrchu. Mae gwneud gwin yma yn stori lwyddiant go iawn, ac mae Wythnos Gwin Cymru yn gyfle perffaith i ddathlu’r diwydiant sy’n tyfu hwn. Rwy’n eich gwahodd i godi gwydr a thostio gwin Cymru. Iechyd Da!"
Am ragor o wybodaeth am Wythnos Gwin Cymru a rhaglen lawn o ddigwyddiadau ewch i Wythnos Gwin Cymru.