Mae cynhyrchwyr bwyd a diod o Gymru yn annog y teimlad o undod y Nadolig hwn trwy gydweithio i greu ystod unigryw o focsys rhoddion a hamperi ar gyfer siopwyr.
Dyma'r tro cyntaf i'r cyfuniadau cynnyrch cyffrous hyn ddod ynghyd. Yn llawn bwyd a diod o Gymru, mae'r bocsys rhoddion a’r hamperi yn berffaith ar gyfer y rhai sy’n caru bwyd melys a sawrus fel ei gilydd - ynghyd ag ychydig o ddiodydd a danteithion. Ar gael mewn amrywiaeth o feintiau a phrisiau, maent yn sicr o weddu i bob poced a chwaeth.
Mae deg cynhyrchydd bwyd a diod o Gymru yn manteisio ar y cydweithredu gan
ddod â busnesau ynghyd, casglu'r nwyddau, a gweithredu fel pwynt gwerthu ar gyfer
siopwyr. Gellir dod o hyd i'r holl focsys rhoddion a hamperi ar Fap Cynhyrchwyr Cywain (cywain.cymru) sy'n ehangu o hyd, ac maent hefyd ar gael i'w prynu'n uniongyrchol oddi wrth:
- Aberfalls Distillery (www.aberfallsdistillery.com)
- Black Mountains Smokery (www.smoked-foods.co.uk)
- Blas ar Fwyd (www.blasarfwyd.com)
- Bluestone Brewing Company (www.bluestonebrewing.co.uk)
- Calon Wen (www.calonwen-cymru.com/direct/)
- Caws Cenarth (www.cawscenarth.co.uk)
- Cwmfarm Charcuterie Products (www.cwmfarm.co.uk)
- Daffodil Foods (www.daffodilfoods.co.uk)
- Rhug Estate Organic Farm (www.rhug.co.uk)
- Wye Valley Producers (www.wyevalleyproducers.co.uk)
Mae'r bocsys rhoddion a hamperi yn cynnwys pob math o gynnyrch o Gymru, gyda mwy na 50 o gwmnïau bwyd a diod yn cymryd rhan ac yn cynnig popeth o gacennau, cig a siytni i pâté, cwrw, siocled a chaws.
Yn eu plith, mae jamiau o'r Preservation Society, danteithion melys gan Gwmni Wickedly Welsh Chocolate, sawsiau a sbeisys gan Maggie's Exotic Foods, diodydd pefriog premiwm o Radnor Hills, pâté o Patchwork Foods, caws o gwmni Caws Teifi, a byrbrydau crefftus wedi’i cochi o Trailhead Fine Foods.
Mae llawer o'r cynhyrchwyr sydd wedi'u cynnwys yn y bocsys rhoddion a’r hamperi wedi'u dwyn ynghyd gan fenter Clwstwr Bwyd Da Cymru, sy'n meithrin cysylltiadau rhwng busnesau yn y sector.
Fel rhan o'r bocsys rhoddion a’r hamperi, mae'r Clwstwr Bwyd Da Bwyd a Diod Cymru wedi darparu deunyddiau marchnata a grëwyd yn arbennig i gynhyrchwyr sy'n tynnu sylw at eu gweithgaredd ar y cyd ac yn annog cwsmeriaid i #CefnogiLleolCefnogiCymru.
Wedi'i ariannu gan Lywodraeth Cymru, mae Clwstwr Bwyd Da Cymru yn cael ei hwyluso gan brosiect Cywain. Wedi'i gyflwyno gan Menter a Busnes, mae prosiect Cywain yn cefnogi datblygiad busnesau sy'n canolbwyntio ar dwf yn y sector bwyd a diod yng Nghymru.
Trwy ddilyn y categori 'Anrhegion a Hamperi' ar Fap Cywain, bydd siopwyr yn cael eu harwain at focsys rhoddion a hamperi Clwstwr Bwyd Da Cymru y gellir eu harchebu'n uniongyrchol trwy wefannau'r cynhyrchwyr.
Dywedodd Arweinydd Tîm y Clystyrau, Sioned Best, “Trwy gydweithio, mae cwmnïau bwyd a diod Cymru wedi creu rhywbeth arbennig sydd nid yn unig yn ymgorffori ysbryd cydweithredu, ond ysbryd y Nadolig. Mae'r neges hon yn arbennig o bwysig ar adeg pan rydyn ni'n annog pobl i ddangos eu gwerthfawrogiad o gynhyrchwyr ac i #CefnogiLleolCefnogiCymru."
Dywedodd Lesley Griffiths, Gweinidog yr Amgylchedd, Ynni a Materion Gwledig, “Mae'n wych bod dros 50 o gynhyrchwyr wedi dod at ei gilydd ac yn gweithio i'w gwneud hi'n haws fyth i'r cyhoedd gael gafael ar fwyd a diod o Gymru. Mae'r cydweithrediad hamper hwn yn enghraifft wych o'r egwyddor o glystyru ar waith.”