Gall cynhyrchwyr wyau maes dderbyn cyngor ar leihau’r canran o wyau o ansawdd eilradd sy’n cael eu dodwy gan eu heidiau yn ystod darllediad byw oddi ar fferm ddofednod y mis hwn.
Mae fferm Y Wern, safle arddangos Cyswllt Ffermio yn Y Foel, ger Y Trallwng, yn mabwysiadu dulliau cynhyrchu a fydd yn ei helpu i fodloni gofynion y farchnad wyau.
Mae hyn yn cynnwys mesurau i leihau'r wyau o ansawdd eilradd a gynhyrchir gan ei haid o 32,000 o ieir Bovan Brown, a fydd hefyd yn gwella proffidioldeb.
Yn ystod digwyddiad Cyswllt Ffermio yn fyw o’r fferm arddangos ym mis Awst, bydd y ffermwr Osian Williams yn rhoi trosolwg o'r prosiect newydd ar y cyd â Cyswllt Ffermio i fynd i'r afael â'r mater hwn.
Bydd y darllediad byw o'i fferm yn cael ei gynnal ar 19 Awst am 7.30 pm.
Yn ogystal â gwella ansawdd wyau, mae Mr Williams yn ymchwilio i ffyrdd o wella ansawdd dŵr yfed yn ei system ddofednod.
"Nid ydym yn brechu ein dofednod ar ôl iddyn nhw gyrraedd y fferm ac felly mae'n hanfodol ein bod yn gwneud popeth o fewn ein gallu i ddarparu dŵr yfed o'r ansawdd gorau i amddiffyn a diogelu iechyd y ddiadell,” meddai.
Bydd ystod o arbenigwyr yn y meysydd hyn hefyd yn ymuno â’r drafodaeth o bell.
Ceir cyngor hefyd ynglŷn â sut y gellid addasu amgylchedd yr ieir gan ddefnyddio technoleg i wella iechyd a chynhyrchiant.
"Yn ogystal â thrafod y prosiectau, bydd ein harbenigwyr yn cynnig cyngor ac argymhellion cyffredinol, gyda'r nod o helpu ffermwyr i wella eu busnesau," meddai Catherine Price, swyddog technegol dofednod Cyswllt Ffermio.
I gofrestru ar gyfer y digwyddiad anfonwch e-bost at Catherine: cath.price@menterabusnes.co.uk
Neu ewch i https://wales.business-events.org.uk/cy/digwyddiadau/gweminar-yn-fyw-or-fferm-wern/
Mae Cyswllt Ffermio, sy’n cael ei ddarparu gan Menter a Busnes a Lantra, yn cael ei gyllidodrwy Cymunedau Gwledig Llywodraeth Cymru -Rhaglen Datblygu Gwledig Cymru 2014-2020, a ariennir gan Lywodraeth Cymru a’r Gronfa Amaethyddol Ewrop ar gyfer Datblygu Gwledig.