Nicholas John Bradley

Mae Nick Bradley yn ŵr busnes profiadol sydd, dros y pum mlynedd ar hugain ddiwethaf, wedi gweithio fel ymgynghorydd annibynnol gydag entrepreneuriaid, busnesau newydd a chwmnïau ifanc sydd yn y camau cychwynnol.

Mae'n raddedig o Brifysgol Bangor ac mae wedi gweithio yn Ffrainc, y Swistir a'r Almaen.   Bu'n gyflogedig gan gwmni Americanaidd Rhyngwladol am saith mlynedd.   Bu hefyd yn gweithio yn y diwydiannau cemegol ac electronig, ym myd mân-werthu ac yn y maes meddygol. 
                
Mae Nick yn entrepreneur o fri sydd wedi dechrau ei fusnes ffibr optig ei hun gan fynd ymlaen i adeiladu cwmni roboteg, busnes anrhegion rhyngwladol a chwmni argraffu arbenigol.

Am ddeuddeg mlynedd gweithiodd fel Uwch Fentor o dan y Cynllun Mentora Hŷn DTI, gan fentora dros ddeg ar hugain o fusnesau am gyfnodau o hyd at ddwy flynedd.   Y mae hefyd wedi gweithio gyda chwmnïau ar draws Cymru gyfan fel ymgynghorydd marchnata allforion gyda Busnes Cymru Rhyngwladol. Mae gan Nick wybodaeth bersonol am allforio cynnyrch meddygol, offeryniaeth, crefft, cynnyrch ac anrhegion defnyddwyr i Ewrop, Goledd America a'r Dwyrain Pell.

Am bedair blynedd bu Nick yn darlithio mewn Entrepreneuriaeth fel Academydd ar Ymweliad ym Mhrifysgol Bangor ac am bymtheg mlynedd roedd yn Rheolwr Rhanbarthol Gogledd Cymru ar gyfer Xenos - Rhwydwaith Busnes Angel Cymru.

Dros y 12 mlynedd ddiwethaf, mae wedi gweithio gydag entrepreneuriaid 18-30 oed fel Mentor Gwirfoddol gydag Ymddiriedolaeth y Tywysog a thros y 16 mlynedd ddiwethaf mae wedi bod yn Fentor Gwirfoddol gyda Prime Cymru gan helpu rhai dros 50 oed gyda'u syniadau busnes.
 
Sefydlodd Nick Anglesey Consultants Ltd er mwyn darparu cefnogaeth marchnata, ymchwil y farchnad a mentora i gwmnïau yng Nghymru, i annog busnesau newydd a darparu cymorth gyda datblygu cynlluniau busnes a chynyddu twf ariannol.  

Mae diddordebau amser hamdden Nick yn cynnwys hwylio pellteroedd hir, mynydda a chwarae bridge.