Dydd Iau 28 Ionawr, mynychodd y Dirprwy Weinidog Ffermio a Bwyd, Rebecca Evans Ganolfan Ffenomeg Planhigion Genedlaethol Athrofa’r Gwyddorau Biolegol, Amgylcheddol a Gwledig Prifysgol Aberystwyth (IBERS) yng Ngogerddan i lansio Partneriaeth Arloesedd Ewrop ar gyfer Cynhyrchiant Amaethyddol a Chynaliadwyedd yng Nghymru (PAE Cymru). Bydd PAE Cymru, a ariennir gan y Gronfa Amaethyddol Ewropeaidd ar gyfer Datblygiad Gwledig a Llywodraeth Cymru, yn cael ei gefnogi gan Ganolfan Gyfnewid Gwybodaeth Cyswllt Ffermio, a leolir yn IBERS.
“Wedi’i ddatblygu gan yr UE yn 2012, mae EIP-Agri bellach yn rhan allweddol o atgyfnerthu ymchwil ac arloesedd mewn amaeth ledled Ewrop. Ei rôl yw casglu arbenigedd ac adnoddau i ddod â grwpiau o bobl o gefndiroedd ymarferol a gwyddonol ynghyd er mwyn mynd i’r afael â heriau penodol, a threialu dulliau newydd a fydd o fantais i eraill yn y diwydiant amaeth neu goedwigaeth. Rwy’n hynod falch bod y gwasanaeth hwn bellach ar gael yng Nghymru,” meddai’r Dirprwy Weinidog.
Cyfeiriodd yr Athro Mike Gooding, Cyfarwyddwr IBERS, at y synergedd rhwng nodau Partneriaeth Arloesedd Ewrop yng Nghymru â'r Ganolfan Gyfnewid Gwybodaeth sydd yn fenter trosglwyddo gwybodaeth newydd a chyffrous fydd yn cynorthwyo'r diwydiannau amaeth a choedwigaeth yng Nghymru i foderneiddio trwy weithredu syniadau a thechnolegau newydd.
“Rydym ni'n awyddus i glywed gan ffermwyr a choedwigwyr sydd â syniad yn ymwneud ag edrych ar broblem neu her benodol, neu ddull newydd yr hoffent ei dreialu neu brofi," meddai'r Athro Gooding.
Canolfan Gyfnewid Gwybodaeth Cyswllt Ffermio fydd y pwynt cyswllt cyntaf i ffermwyr a choedwigwyr yng Nghymru sydd â diddordeb cynnal prosiect i dreialu syniad neu dechnoleg newydd PAE Cymru. Bydd cymorth ariannol ar gael i hwyluso'r broses o ffurfio grwpiau, a fydd yn cael eu galw'n Grwpiau Gweithredol. Bydd y Ganolfan Gyfnewid Gwybodaeth yn rhoi arweiniad ynglŷn â'r ymchwil sydd eisoes wedi cael ei wneud a'r meddylfryd diweddaraf, fel y gall Grwpiau Gweithredol fanteisio ar wybodaeth sydd eisoes ar gael wrth iddynt ddatblygu eu hymatebion eu hunain. Mae ‘Broceriaid Arloesedd’ ar gael i gefnogi ac i hwyluso datblygiad prosiectau Grwpiau Gweithredol a’u harwain drwy'r broses ymgeisio am gymorth ariannol gan Lywodraeth Cymru i ddarparu eu prosiect.
Eglurodd yr Athro Jamie Newbold, Cyfarwyddwr Partneriaethau Hyfforddi Uwch yn IBERS, a ymunodd â’r Dirprwy Weinidog ac uwch swyddogion Llywodraeth Cymru ar daith o’r Ganolfan Ffenomeg Planhigion Genedlaethol, sut y bydd gan y ganolfan, ynghyd â broceriaeth arloesedd yn cael eu cysylltu â rhaglen Trosglwyddo Gwybodaeth Cyswllt Ffermio botensial i gynnig manteision sylweddol i’r diwydiant yng Nghymru.
“Bydd y cydweithrediad rhwng Cyswllt Ffermio ac IBERS Prifysgol Aberystwyth yn atgyfnerthu cysylltiadau rhwng ffermwyr a choedwigwyr a gwyddonwyr ymchwil.
“Bydd prosiectau Partneriaeth Arloesedd Ewrop yng Nghymru, ynghyd â'r gwaith a wneir trwy'r Ganolfan Gyfnewid Gwybodaeth, fydd yn rhoi mewnbwn academaidd i rwydwaith safleoedd arddangos Cyswllt Ffermio, yn hybu treialu'r ymchwil a'r dechnoleg ddiweddaraf ar fentrau fferm a choedwigaeth gan arwain at ddiwydiant cryfach a mwy cystadleuol yn y blynyddoedd i ddod", meddai'r Athro Newbold.
Am fwy o fanylion ynglŷn â Phartneriaeth Arloesedd Ewrop yng Nghymru, ac am ddyddiadau'r cyfnod ymgeisio cyntaf ar gyfer cymorth ariannol, ewch i dudalen Phartneriaeth Arloesedd Ewrop yng Nghymru ar y wefan.