Ffenest siop i gynnyrch Dyffryn Conwy ar faes carafanau’r brifwyl

Aelodau grŵp craidd Pantri Crwst yw:

• Cwmni ffrwythau a llysiau Belmont, Euros Evans, y bedwaredd genhedlaeth o’i deulu sy’n ffermio yn Llanddoged ac sy’n cynaeafu amrywiaeth o lysiau cartref o'r fferm deuluol dafliad carreg uwchben tref Llanrwst.
• Emyr Hughes, sy’n cynhyrchu wyau Cae Melwr yn ogystal â bisgedi a bara dan yr enw ‘O’r Maen.’ Mae’r gwenith a dyfwyd ar y fferm deuluol, yn cael ei felino yng Nghymru a’r cynnyrch terfynol yn cael ei gynhyrchu gan Fecws Scilicorns, Llanrwst.
• Cigydd Arwel L Jones, sydd â siop ar Stryd Dinbych, Llanrwst sy’n gwerthu pasteiod cig cartref sawrus o ansawdd yn ogystal â chig eidion, oen a phorc blasus Cymreig.
• Siwgr a Sbeis, becws Cymreig blaengar sy'n gwerthu cacennau, pwdinau a quiches sawrus sy'n dathlu eu pen-blwydd yn 30 oed eleni yn dilyn sefydlu’r cwmni yn Llanrwst gan ddwy ffrind, Rhian Williams a Rhian Owen.
• Cigydd Elystan Metcalfe, a sefydlodd ei fusnes dros 30 mlynedd yn ôl ac sy’n gwerthu cigoedd Cymreig o ansawdd sy’n tarddu o ffermydd Dyffryn Conwy a Dyffryn Clwyd. Mae'r siop wedi ei leoli ar Stryd Watling, Llanrwst.

Yn ogystal, bydd Bragdy Nant ar y safle yn gwerthu cwrw Cymreig cain, ac mae’r criw wedi creu cwrw crefft newydd sbon, ‘Crwst IPA,’ yn arbennig ar gyfer yr Eisteddfod. Mae dod â chwmnïau ychwanegol eraill, fel Becws Scilicorns, Blas ar Fwyd, Health and Food a Spar, Llanrwst, yn helpu i gynnig yr amrywiaeth o gynnyrch y byddai pobl yn disgwyl eu gweld mewn siop un stop ar safle maes carafanau.

“Rydyn ni’n gyffrous iawn,” eglura Iona Edwards, un o gonglfeini cysyniad Pantri Crwst. Mae hi’n dod â'i harbenigedd, fel cyfrifydd siartredig i’r botes, ond mae hefyd yn wraig fferm ac yn gwasanaethu anghenion ariannol llawer o deuluoedd amaethyddol o'i swyddfa cyfrifydd yn Llanrwst. Mae hi hefyd yn deall y pwysau sydd ar unigolion o redeg busnesau gwledig.

“Daeth y syniad cychwynnol gan Bwyllgor Apêl Llanrwst ar gyfer yr Eisteddfod,” eglurodd Iona, Cadeirydd Pwyllgor Apêl Llanrwst. “Roedden ni’n awyddus i sicrhau bod y dref yn rhan ganolog o'r ŵyl, a bod y manteision economaidd yn cyrraedd y bobl leol, yn ogystal â'r nifer o fusnesau a sefydliadau sy'n ymwneud yn uniongyrchol â'r Eisteddfod.

“Roedd Llŷr Serw, aelod arall o'r pwyllgor apêl a mab ffarm, eisiau datblygu'r syniad y gallai siop ar safle'r ŵyl fod yn ffenestr siop i rywfaint o'r bwyd a diod gwych a gynhyrchir yma yn Nyffryn Conwy. Ac wrth ddod â blas o dref farchnad Llanrwst i Eisteddfotwyr, mae’n arddangos y gorau o'r hyn sydd gennym i'w chynnig, a hynny am bris cystadleuol, diolch i’r sefydliadau sy’n cefnogi’r fenter. Gobeithio y bydd hefyd yn gadael gwaddol o ymweliad yr Eisteddfod â ni yma yn Sir Conwy,” eglura Iona.

Un o'r cynhyrchwyr sy'n edrych ymlaen at arddangos eu cynnyrch ym Mhantri Crwst yw’r ffermwr, Emyr Hughes o Gae Melwr, Llanrwst. Wrth dyfu gwenith ar gaeau'r fferm ddefaid a llysiau 600 erw, melino’r gwenith ar Ynys Môn, a chynhyrchu blawd ar gyfer ei fecws lleol, mae Emyr wrth ei fodd bod bisgedi a bara ‘O’r Maen’ yn parhau i werthu'n dda yn lleol, chwe blynedd wedi cychwyn y fenter.

“Fe wnaeth Becws Scilicorns, Llanrwst arbrofi dipyn gyda'r cynhwysion a phenderfynu yn y diwedd i ychwanegu rhywfaint o flawd gwyn at y blawd cyflawn i sicrhau’r does berffaith. Mae'r blas yn arbennig, ac mae'n mynd â phobl yn ôl i'r ffurf draddodiadol o bobi bara gan ddefnyddio cynhwysion cwbl naturiol. Toes dim byd yn cael ei ychwanegu i’r 5 cynhwysyn arferol, ac mae’r bara'n blasu'n hyfryd, yn ffres o'r popty wedi'i ledaenu â menyn cartref,” eglura Emyr.

Bydd wyau Cae Melwr hefyd ar werth ym Mhantri Crwst: “Bydd ein 15,000 o ieir maes yn cynhyrchu mwy na digon o wyau i fynychwyr yr Ŵyl yn ystod wythnos yr Eisteddfod, gobeithio!”