Sicrhau’r dulliau gorau o reoli Llyngyr yr lau: prawf diagnostig llif unffordd

Mae llyngyr yr iau’n parhau i osod beichiau economaidd sylweddol o ganlyniad i fwy o farwolaethau a cholledion cynhyrchu, ond mae rheolaeth effeithiol, wedi'i thargedu, yn parhau i fod yn bryder parhaus i lawer o gynhyrchwyr. Mae arferion traddodiadol yn aml yn cynnwys triniaethau llyngyr proffylactig, a roddir yn rheolaidd heb wybodaeth fanwl am statws neu risg gwirioneddol yr haint. Mae anfanteision cynhenid i’r dull hwn, gan gynnwys dyrannu adnoddau’n aneffeithlon, posibilrwydd o ddatblygu ymwrthedd i feddyginiaeth gwrthlyngyr, ac effeithiau amgylcheddol annymunol.

Mae ymddangosiad prawf diagnostig llif unffordd newydd yn cyflwyno cyfle trawsnewidiol i fireinio strategaethau rheoli llyngyr yr iau. Mae'r offeryn diagnostig datblygedig hwn yn galluogi asesiad cyflym ar y fferm o’r cysylltiad â llyngyr, a thrwy hynny, hwyluso dull o driniaeth sy’n fwy seiliedig ar dystiolaeth ac sydd wedi’i dargedu’n fwy penodol. Mae ein prosiect wedi'i gynllunio i alluogi ffermwyr i ddefnyddio'r gallu diagnostig arloesol hwn yn effeithiol trwy roi’r wybodaeth a'r cymorth angenrheidiol iddynt, gan eu grymuso i wneud penderfyniadau gwybodus ynghylch cymhwyso triniaethau llyngyr.

Mae'r prosiect hwn yn ymdrech gydweithredol, sy'n dod â 15 o ffermwyr defaid ynghyd o grwpiau trafod defaid Cyswllt Ffermio, Flock Health Ltd, a Phrifysgol Aberystwyth. Mae'r ffermydd prosiect hyn wedi ymrwymo i weithio ar y cyd a rhannu eu canfyddiadau gyda'r sector amaethyddol ehangach.

Mae amcanion allweddol y fenter hon yn cynnwys:

• Hyrwyddo penderfyniadau gwybodus: Rhoi cymorth i ffermwyr i ddehongli canlyniadau profion yn gywir, er mwyn pennu amseriad gorau posib triniaeth ac a oes ei hangen.
• Hwyluso ymyrraeth wedi'i thargedu: Dangos sut y gall profion sy'n seiliedig ar dystiolaeth symud protocolau triniaeth o’u rhoi yn rhan o’r drefn arferol i ddull manwl gywir a gaiff ei lywio gan angen.
• Gwella effeithlonrwydd adnoddau: Tynnu sylw at fanteision triniaeth wedi'i thargedu, gan gynnwys llai o wariant ar feddyginiaethau milfeddygol a lleihau'r effaith amgylcheddol.
• Ategu cynllunio iechyd strategol: Galluogi ffermwyr i fapio risg llyngyr yr iau ar y fferm yn gynhwysfawr, a thrwy hynny, integreiddio strategaeth reoli fwy manwl gywir a rhagweithiol yn eu cynlluniau iechyd diadell blynyddol.
   

Bydd y prosiect hefyd yn cyfrannu at ganlyniadau Rheoli Tir yn Gynaliadwy, gan gynnwys:

• Cyflawni a hyrwyddo safonau uchel o iechyd a lles anifeiliaid
• Lleihau allyriadau nwyon tŷ gwydr