Grug Evans
MAESYFED
Grug Evans yw Swyddog Datblygu Cyswllt Ffermio ar gyfer ardal Maesyfed.
Merch cefn gwlad o Ddyffryn Banw ger Llanfair Caereinion yw Grug, sy’n byw gartref gyda’i rhieni a’i brawd. Busnes contractio amaethyddol sydd gan ei thad ac ers rhai blynyddoedd bellach mae wedi arallgyfeirio i mewn i’r diwydiant naddion pren a thorri coed, ac yn ddiweddar mae’r teulu wedi dechrau busnes newydd ‘Cutiau Cwm Canada’ drwy gynnig gwyliau mewn ‘Cwt Bugail’ ar gaeau’r ffarm.
Er mae cwrs Busnes a Marchnata astudiodd Grug ym Mhrifysgol Bangor, mae gweithio yn y diwydiant amaethyddol wedi bod o ddiddordeb iddi. Ers graddio yn 2023 cafodd swydd gydag Adran Farchnata Cyswllt Ffermio cyn newid swydd i fod yn Swyddog Datblygu De Maldwyn ddechrau 2024.
Mae Grug yn aelod brwd o CFfI Dyffryn Banw ac yn annog aelodau’r ffermwyr ifanc i ddefnyddio’r holl gyfleusterau sydd ar gael iddynt yn y diwydiant amaethyddiaeth. Mae’n ysgrifenyddes y Pwyllgor Amaethyddol a Chadeirydd Pwyllgor Rhyngwladol CFfI Maldwyn. Mae’n mwynhau cymryd rhan yng ngweithgareddau cymunedol megis yr Urdd, Canu a bod ynghlwm â Chwmni Theatr Maldwyn.
Drwy ddefnyddio cyfleusterau Cyswllt Ffermio drwy’r busnes mae hi wedi gweld cymaint o fudd mae’r rhaglen yn cynnig i ffermwyr drwy ystod eang o wasanaethau. Drwy gymorth y rhaglen fentora cafwyd cyngor gan 2 fentor gwahanol cyn sefydlu ‘Cutiau Cwm Canada’ yn ystod tymor y Gwanwyn 2023 yn ogystal â mynd i ddigwyddiad Arloesi ac Arallgyfeirio yn Llanelwedd- digwyddiad gwych i gael gweld syniadau newydd sy’n codi yn y sector a chael gwrando ar siaradwyr y diwydiant- mae rhywbeth at ddant pawb drwy Gyswllt Ffermio.
Mae Grug hefyd yn hwyluso grwpiau trafod sector bîff, llaeth a defaid yr ardal. Drwy’r grwpiau trafod mae’n gyfle i ffermwyr gymharu data a chynnig cyngor o bethau y gellir eu gwella ar y fferm. Mae’n ‘fan diogel’ i ffermwyr ddod at ei gilydd a rhannu unrhyw broblemau sydd yn codi.
Mae Grug hefyd yn mynd i Farchnad Y Trallwng bob bore dydd Llun i gwrdd â ffermwyr yr ardal ac ateb unrhyw gwestiynau sydd ganddynt - mae’n newid braf bod allan o’r swyddfa a chwrdd â phobl wyneb yn wyneb.
