01 Hydref 2025
Beth am wella lles anifeiliaid ac effeithlonrwydd eich fferm a pharatoi ar gyfer y Cynllun Ffermio Cynaliadwy gyda phum modiwl e-ddysgu newydd gan Cyswllt Ffermio.
Bydd cwblhau modiwlau dysgu ar-lein newydd Cyswllt Ffermio ar Les Anifeiliaid o dymor yr haf 2025 yn cyflawni'r gofyniad hyfforddiant hyfedredd ar gyfer y Weithred Gyffredinol ar Iechyd a Lles Anifeiliaid am y pum mlynedd nesaf. Bydd cwblhau’r modiwl cyn i’r cynllun gael ei lansio yn 2026 yn ffordd ragweithiol o baratoi a bydd yn eich rhyddhau i ganolbwyntio ar flaenoriaethau eraill unwaith y bydd y cynllun ar waith.
Mae'r modiwlau newydd hyn wedi'u cynllunio i ddarparu gwybodaeth a sgiliau hanfodol ar gyfer arferion ffermio modern, gan ganolbwyntio ar feysydd allweddol yn ymwneud ag iechyd a lles anifeiliaid sy'n hanfodol ar gyfer cynhyrchiant a chynaliadwyedd:
• Sgorio symudedd gwartheg bîff ar gyfer y Cynllun Ffermio Cynaliadwy: Mae'r hyfforddiant hwn yn cyflwyno gwerth sgorio symudedd, gan amlinellu arferion gorau a'r gofynion gofynnol ar gyfer Gweithred Gyffredinol y Cynllun Ffermio Cynaliadwy.
• Sgorio symudedd gwartheg llaeth ar gyfer y Cynllun Ffermio Cynaliadwy: Mae'r hyfforddiant hwn yn trafod sgorio symudedd, gan egluro arferion gorau a’r gofynion gofynnol ar gyfer Gweithred Gyffredinol y Cynllun Ffermio Cynaliadwy.
• Sgorio symudedd defaid ar gyfer y Cynllun Ffermio Cynaliadwy: Byddwch yn cael dealltwriaeth ymarferol o symudedd defaid i wella lles y ddiadell a chefnogi nodau cynaliadwyedd eich fferm. Mae hyn hefyd yn cwmpasu'r gofynion gofynnol ar gyfer Gweithred Gyffredinol y Cynllun Ffermio Cynaliadwy.
• Sgorio cyflwr corff defaid (BCS) ar gyfer y Cynllun Ffermio Cynaliadwy: Modiwl hanfodol i bob ffermwr defaid. Mae'r cwrs hwn yn eich dysgu sut i asesu cyflwr corff yn gywir i sicrhau effeithlonrwydd porthiant, ffrwythlondeb ac iechyd gorau posibl y ddiadell. Mae hyn hefyd yn cwmpasu'r gofynion gofynnol ar gyfer Gweithred Gyffredinol y Cynllun Ffermio Cynaliadwy.
• Sgorio cyflwr corff gwartheg ar gyfer y Cynllun Ffermio Cynaliadwy: Dysgwch y technegau hanfodol ar gyfer sgorio cyflwr corff gwartheg i reoli maeth, gwella effeithlonrwydd atgenhedlu, a sicrhau lles eich buches. Mae hyn hefyd yn cwmpasu'r gofynion gofynnol ar gyfer Gweithred Gyffredinol y Cynllun Ffermio Cynaliadwy.
Mae'r modiwlau hyn yn adnodd ardderchog i unrhyw un sy'n awyddus i ddatblygu eu sgiliau a sicrhau bod eu fferm yn barod ar gyfer y dyfodol.
'Mae'r modiwlau hyn yn mynd i'r afael â dau o'r ffynonellau mwyaf arwyddocaol o ran perygl i les ar ffermydd yng Nghymru, sef cloffni a maeth gwael. Bydd y modiwlau'n eich helpu i gael gwell dealltwriaeth o iechyd a chyflwr eich da byw, a pha arwyddion allweddol i edrych amdanynt sy'n dangos y gallai fod angen ymyrraeth. Bydd cwblhau'r modiwlau hyn yn eich helpu i leihau'r risg o glefyd, gwella cynhyrchiant eich da byw a gwella lles. Mae hefyd yn helpu i ddangos eich ymrwymiad i safonau iechyd a lles anifeiliaid uchel i brosesyddion yn y gadwyn gyflenwi bwyd.' Swyddfa Gyffredin y Prif Swyddog Milfeddygol.
Os ydych chi'n berchennog busnes neu'n bartner ac yn cwblhau'r hyfforddiant hwn ar ôl i'r cynllun lansio yn 2026, gall y ddwy awr gyfrif tuag at eich chwe awr ofynnol o DPP y flwyddyn. Fodd bynnag, ni fydd yr hyfforddiant yn cyfrif tuag at y gofyniad hwn os ydych chi'n weithiwr ac nid ydych yn berchennog busnes, partner na chyfarwyddwr.
Bydd pob modiwl e-ddysgu a gwblheir yn cael ei gofnodi ar gofnod DPP 'Storfa Sgiliau' y defnyddiwr ynghyd â 'thystysgrif cwblhau' Gwobrau Lantra.
Am ragor o wybodaeth ewch i wefan Cyswllt Ffermio https://businesswales.gov.wales/farmingconnect/cy neu cysylltwch â'ch swyddog datblygu lleol i gael rhagor o wybodaeth.