Bydd edrych ar ddulliau i leihau defnydd gwrthfiotigau yn ystod cyfnod ŵyna yn un o’r pynciau allweddol fydd yn cael eu trafod yn ystod Diwrnod Agored Cyswllt Ffermio.
Bydd y Milfeddyg Kate Hovers yn darparu trosolwg o brosiect sydd ar waith ar fferm Plas, Llandegfan Ynys Môn - un o Safleoedd Arddangos Cyswllt Ffermio - er mwyn lleihau’r defnydd a wneir o wrthfiotigau yn ystod y cyfnod ŵyna. Bydd yr ymgynghorydd maeth da byw, Hefin Richards, yn trafod gofynion maeth gwartheg bîff, a bydd hefyd yn rhoi cyflwyniad ynglŷn â pharatoi dognau ar gyfer gwartheg.
Bydd y digwyddiad hefyd yn cynnwys taith fferm a chyflwyniad i’r system ffermio ar fferm Plas yng nghwmni’r ffermwr, Arwyn Jones.
Dywedodd Gethin Prys Davies, Swyddog Technegol Cyswllt Ffermio: “Mae croeso i bawb ymuno â ni yn y diwrnod agored ar y fferm i gael rhagflas o’r prosiectau a fydd yn cael eu cynnal yno.”
Diwrnod Agored Plas
Lleoliad: Plas, Llandegfan, Ynys Môn LL59 5SB
Dyddiad: Dydd Mercher 26ain Hydref 2016
Amser: 11:00 – 14:30
Am fwy o fanylion ynglŷn â’r digwyddiad, cysylltwch â Gethin Prys Davies ar 01248 660073 neu 07772 694941 gethin.prys.davies@menterabusnes.co.uk