Dyddiad i’w nodi: Cyswllt Ffermio yn cynnig cymorth i dyfwyr a ffermwyr yng Ngŵyl y Gwanwyn

12 Mai 2025

Dyddiad i’w nodi: Cyswllt Ffermio yn cynnig cymorth i dyfwyr a ffermwyr yng Ngŵyl y Ganwyn!

Bydd Cyswllt Ffermio yn bresennol yn y digwyddiad i gynnig cymorth a chyngor i ymwelwyr, p'un a ydynt yn dyfwyr profiadol, newydd-ddyfodiaid sydd â diddordeb mewn garddwriaeth, neu ond am ymwneud yn fwy â byd natur.

Bydd Marchnad Tyfwyr fywiog, a fydd yn cynnwys nifer o stondinau masnach cyffrous, o amgylch stondin Cyswllt Ffermio. Er bod garddwriaeth yn rhan ganolog o'r digwyddiad eleni, bydd ein tîm hefyd wrth law i ateb holl ymholiadau cyffredinol mewn perthynas â Cyswllt Ffermio.

Mae croeso i chi ddod i siarad â ni mewn dau leoliad: Bydd tîm Garddwriaeth Cyswllt Ffermio ym Mhafiliwn yr Aelodau, a byddant yn awyddus i drafod eu sesiynau a'u digwyddiadau Cymorth Busnes Garddwriaeth a ariennir yn llawn, ac sydd wedi'u teilwra i gynorthwyo tyfwyr sefydledig a'r rhai sy'n archwilio posibiliadau arallgyfeirio newydd. Byddant ar gael i gynnig cymorth, arweiniad a hyfforddiant i'ch helpu i gyflawni eich dyheadau garddwriaethol. Bydd Swyddogion Datblygu Cyswllt Ffermio a Swyddog Partneriaeth Diogelwch Fferm Cymru (WFSP) hefyd ar gael drwy gydol y penwythnos i archwilio cyfleoedd amrywiol ar gyfer tyfu a datblygu eich busnes a thrafod unrhyw syniadau a allai fod gennych.

Ar gyfer pob cwestiwn ynghylch sgiliau a hyfforddiant, bydd staff a darparwyr hyfforddiant ar gael yn Adeilad Lantra. Byddant yn cynnig arweiniad a chymorth ar sut i gwblhau'r Cynllun Datblygu Personol (PDP), llywio’ch ffordd drwy fodiwlau e-ddysgu, a chyflwyno ceisiadau am gyllid. Er mwyn ein galluogi i ddarparu'r cymorth hwn, gwnewch yn siŵr bod eich manylion mewngofnodi Cyswllt Ffermio gyda chi.

Dros y ddau ddiwrnod, bydd y darparwyr canlynol wrth law i drafod unrhyw ymholiadau hyfforddi:

• Agriconnectors
• Dysgu Bro Ceredigion
• Jimmy Hughes Training Services Ltd
• Milfeddygon Prostock

Hefyd, peidiwch â cholli arddangosiadau coginio cyffrous drwy gydol y ddau ddiwrnod gan Nerys Howell, a fydd yn dangos ffyrdd blasus o ddefnyddio ffrwythau a llysiau tymhorol o Gymru! Dyma gyfle gwych i ddysgu ryseitiau newydd a chael eich ysbrydoli gan gynnyrch lleol.

Un o sawl busnes lleol sy'n ymuno â'r digwyddiad fydd Alan a Justine Burgess o West Wales Willows, sy'n tyfu dros 260 o wahanol fathau o helyg. Mae eu busnes yn gweithredu o dyddyn hyfryd wedi'i leoli yn Sir Gaerfyrddin. Yn ogystal â thynnu sylw at blanhigion helyg ar eu stondin, bydd Justine, sydd hefyd yn artist helyg, yn arddangos rhai o'i chreadigaethau artistig.

Dewch i ddathlu goreuon Cymru wledig gyda ni!

I gael rhagor o wybodaeth, gallwch fynd i wefan Cyswllt Ffermio cysylltwch â'ch Swyddog Datblygu Lleol.

Mae arddangoswyr Cyswllt Ffermio yng Ngŵyl y Gwanwyn yn cynnwys:

Ash & Elm Horticulture (Welsh Flower Barrow)

• Mae ELM (a sefydlwyd gan Emma Maxwell) a Dave Ash wedi creu gardd farchnad amrywiol agroecolegol bum erw.
• Wedi'i lleoli ym mynyddoedd hardd Cambria yn nyffryn Hafren, ychydig filltiroedd yn unig o goedwig Hafren a tharddle Afon Hafren. Mae tref farchnad fechan Llanidloes ond 3 milltir i ffwrdd.
• Mae'r lleoliad yng nghefn gwlad Cymru yn darparu lleoliad unigryw i'w hymdrechion garddio marchnad.

Living Simply Lavender

• Mae Living Simply Lavender yn fusnes bach ffyniannus sydd wedi'i leoli y tu allan i Lanelli, Sir Gaerfyrddin.
• Maent yn tyfu Lavandula Angustifolia (lafant Seisnig) a Lavandin.
• Yn ystod misoedd yr haf, mae'r lafant blodeuol yn cael ei gynaeafu â llaw, ac yna'n cael ei ddistyllu gan ddefnyddio'r broses ddistyllu â dŵr.

NPTC
 

• Grŵp colegau NPTC yw un o'r darparwyr addysg bellach mwyaf yng Nghymru, gyda champysau sy'n cwmpasu 30% o dir y wlad, ac yn gwasanaethu mwy na 270,000 o drigolion, yn ymestyn o’r de i’r gogledd.
• Mae gan yr adran arddwriaeth gyfleusterau mewn tri champws: sef Castell-nedd, Aberhonddu a'r Drenewydd, sy'n cynnig amrywiaeth o gyrsiau llawn a rhan-amser o lefel 1 i lefel 3.

P&J Plants

• Mae P&J Plants yn fusnes teuluol, sy'n gweithredu ers canol yr 80au.
• Mae’r busnes wedi'i leoli ym Madley (Swydd Henffordd), ac mae’n arbenigo mewn planhigion cigysol – ffurfiau sarracenia yn bennaf – ond caiff mathau eraill eu gwerthu hefyd.

West Wales Willows

• Mae Justine ac Alan Burgess yn rhedeg West Wales Willows o dyddyn yng nghefn gwlad hardd Sir Gaerfyrddin.
• A hwythau’n tyfu dros 260 o fathau o helyg, maent yn cynnal y Casgliad Cenedlaethol o Salix, a reolir gan Plant Heritage. Mae Justine hefyd yn artist helyg, a bydd yn arddangos rhai o'i chreadigaethau, yn ogystal â phlanhigion helyg, ar y stondin.

Perennial

• Perennial yw'r unig elusen yn y DU sy'n ymroddedig i helpu pobl mewn garddwriaeth a'u teuluoedd.

Microacres

• Darganfyddwch fyd o flas gyda microwyrddion, blodau bwytadwy, a madarch gourmet arbenigol o’r radd flaenaf, wedi'u tyfu'n gynaliadwy.
• Caiff y planhigion eu cynaeafu â llaw, gyda sylw i fanylion, o'u fferm fertigol drefol, gan ddefnyddio dulliau tyfu cynaliadwy.
• Mae eu microlysiau a pherlysiau lliwgar yn trawsnewid prydau cyffredin yn greadigaethau coginio anhygoel. O geginau bwytai i goginio gartref, gallwch ychwanegu hyrddiad o liw, gwead a blas ffres a lleol i'ch prydau. Ffresni o'r fferm i'r fforc.
• Wedi'i dosbarthu’n lleol. Wedi'i dyfu â chariad, yng Nghymru. Yn naturiol flasus.

Farmers Welsh Lavender Ltd

• Mae Farmers' Welsh Lavender yn wneuthurwyr elïoedd gofal corff a balmau sydd wedi’u lleoli bum milltir o faes y sioe.
• Ewch i'r fferm i weld sut maen nhw'n tyfu ac yn distyllu lafant. Mae cynhyrchion moethus FARMERS i'w gweld ledled y byd... yn eu siop flaenllaw ddeniadol yn y Gelli Gandryll ac ar y gobennydd pe baech chi'n aros yng Ngwesty'r Savoy yn Llundain.

The Fungi Folk

• Mae'r Fungi Folk yn fferm fadarch sy’n wedi’i hardystio’n organig ym mryniau tonnog De Cymru, sy'n tyfu amrywiaeth o fadarch gourmet a meddyginiaethol ac yn cynhyrchu tinturiau ac echdynion.
• Gallwch ddod o hyd iddi ar-lein, ac mewn marchnadoedd a digwyddiadau ledled Cymru a De-orllewin Lloegr.

Cyswllt Ffermio

• Bydd staff Cyswllt Ffermio yn yr adeilad yn darparu gwybodaeth i aelodau'r cyhoedd ynghylch y cymorth busnes garddwriaeth y mae'r tîm yn ei gynnig i ffermwyr a thyfwyr, gan adeiladu diwydiant garddwriaeth cryfach yng Nghymru.