18 Mehefin 2025
Mae Cyswllt Ffermio yn cynnig gweithdy hyfforddiant iechyd a lles anifeiliaid wedi'i ariannu'n llawn, ag achrediad Lantra - sef 'Rheoli Teirw Bridio'. Bydd yn cael ei ddarparu gan bractisau milfeddygol lleol cymeradwy ledled Cymru, ac mae wedi'i gynllunio i gynorthwyo ffermwyr i wella perfformiad eu buches a sicrhau lles eu teirw ar y fferm.
Bydd mynychwyr yn cael dealltwriaeth ddyfnach o bwysigrwydd dewis y tarw cywir ar gyfer perfformiad a chynhyrchiant eich buches. Bydd y gweithdy hefyd yn rhoi mewnwelediad i'r ffactorau allweddol i'w hystyried wrth asesu addasrwydd tarw ar gyfer bridio, gan gynnwys Sgôr Cyflwr Corff.
Bydd yn rhoi cyfle i ddysgu am y gwahanol resymau dros anffrwythlondeb teirw a darganfod strategaethau effeithiol ar gyfer ei atal a'i reoli. Bydd rôl hanfodol profion ffrwythlondeb cyn-fridio wrth sicrhau tymor bridio llwyddiannus hefyd yn cael ei archwilio.
Bydd y gweithdy yn eich helpu i ddod yn ymwybodol o'r triniaethau arferol a'r ystyriaethau maeth sydd eu hangen ar gyfer paratoi teirw cyn bridio, yn ogystal â dysgu sut i nodi a rheoli'r risgiau bioddiogelwch sy'n gysylltiedig â chyflwyno teirw newydd o fuchesi eraill.
Yn olaf, bydd y gweithdy yn edrych ar rai o'r nodweddion y gellir eu hasesu trwy Werthoedd Bridio Tybiedig (EBVs) a sut i'w defnyddio i helpu i ddewis y teirw gorau ar gyfer eich buches.
Mae'r gweithdy hwn wedi'i gynllunio i roi gwybodaeth ymarferol i chi er mwyn eich galluogi i wella iechyd a chynhyrchiant eich buches.
Dywed Clara Valderamma o Farm First Vets, sy'n un o'r milfeddygon cymeradwy a fydd yn cyflwyno'r gweithdy hyfforddiant newydd, 'Mae'r tarw yn chwarae rhan ganolog yn ffrwythlondeb buchesi, ac mae gwneud pethau’n iawn/yn anghywir yn cael effaith sylweddol ar gynhyrchiant yn y flwyddyn sydd i ddod. Mae gwneud yn siŵr bod teirw yn addas i'r diben yn un o'r camau cyntaf i sicrhau tymor bridio a lloia llwyddiannus.'
Caiff presenoldeb ei gofnodi ar gofnod DPP 'Storfa Sgiliau' y rhai sy’n mynychu’r gweithdy, ynghyd â 'thystysgrif presenoldeb' Gwobrau Lantra.
Mae'r gweithdai hyfforddiant wedi'u hariannu'n llawn, ond er mwyn bod yn gymwys ar gyfer y cyllid hwnnw, rhaid i bob mynychwr fod wedi cofrestru gyda Cyswllt Ffermio a chwblhau Cynllun Datblygu Personol (PDP).
I weld dyddiadau a manylion y gweithdai sydd ar y gweill, ewch i wefan Cyswllt Ffermio neu cysylltwch â'ch swyddog datblygu lleol i ddysgu mwy.