Mae Cyswllt Ffermio newydd lansio ymgyrch recriwtio ledled Cymru er mwyn annog merched sy’n gweithio ym meysydd bwyd, ffermio neu goedwigaeth yng Nghymru i ymuno ag un o’i fforymau ‘Merched mewn Amaeth’ rhanbarthol.
Dywedodd Eirwen Williams, cyfarwyddwr rhaglenni gwledig Menter a Busnes, sy’n darparu Cyswllt Ffermio, a ariennir gan Lywodraeth Cymru a Chronfa Amaethyddol Ewrop ar gyfer Datblygu Gwledig, y byddai pob cyfarfod yn cynnig cyfle unigryw i ferched sy’n gweithio yn y diwydiant leisio eu barn a dylanwadu ar ddatblygiad y diwydiant amaeth yng Nghymru.
Bydd Dr. Nerys Llewelyn Jones, sy’n gyfreithwraig ac yn ffermio yn sir Gâr, yn hwyluso’r tri digwyddiad lle bydd yn gobeithio adeiladu ar fomentwm y gweithdai ‘ôl-Brexit’ a hwyluswyd ganddi yn ystod fforwm Merched mewn Amaeth Cyswllt Ffermio a gynhaliwyd yn Llanelwedd.
“Mynegodd dros 60 o fynychwyr yn y digwyddiad hwnnw ddiddordeb mewn ymuno â fforymau rhanbarthol newydd, felly mae gennym ddigon o ddiddordeb i greu rhwydweithiau deinamig, amaethyddol ar gyfer merched yn unig.
“Bydd hyn yn annog hyd yn oed mwy o ferched sy’n ymwneud yn uniongyrchol â’r sectorau bwyd, ffermio neu goedwigaeth yng Nghymru i ystyried yr opsiynau, i leisio eu barn ac i amlinellu eu blaenoriaethau er mwyn dylanwadu ar yr agenda gwledig yn ystod y cyfnod pwysig hwn, pan fo angen llais cryf ar Gymru,” meddai Mrs Williams.
“Yn y dyfodol, rydym yn bwriadu cynnal cyfarfodydd ar amser ac mewn fformat sy’n addas ar gyfer y merched sy’n cymryd rhan, felly bydd penodi cynrychiolwyr, cytuno ar bynciau trafod neu siaradwyr gwadd a phenderfynu ar fformat ac amlder cyfarfodydd y dyfodol yn gyfrifoldeb i’r mynychwyr.
“Bydd Cyswllt Ffermio yn gweithio’n agos gyda phob fforwm ac yn hwyluso proses er mwyn sicrhau bod deilliannau a barn yn cael eu bwydo’n uniongyrchol i Lywodraeth Cymru,” meddai Mrs. Williams
Os hoffech chi ymuno â’r rhwydwaith Merched mewn Amaeth newydd, cysylltwch â Carys Thomas ar 01970 631402 neu e-bostio carys.thomas@menterabusnes.co.uk.