Bydd Cyswllt Ffermio yn annog ffermwyr yng Nghymru i sicrhau bod eu busnesau’n perfformio ar eu gorau a'u bod yn cadw eu hunain yn ddiogel wrth weithio gydag anifeiliaid yn ystod y Ffair Aeaf eleni!

Gallai meincnodi yn erbyn y busnesau fferm sy’n perfformio o fewn y traean uchaf fod yn sbardun i greu busnesau hyfyw a chynaliadwy i nifer o ffermwyr, yn ôl Cyswllt Ffermio.  

Pwysleisiwyd hynny gan y ffermwyr bîff a defaid, Paul a Dwynwen Williams, Cae Haidd Ucha, Llanrwst, ffermwyr arddangos Cyswllt Ffermio a enwyd yn ddiweddar yn Ffermwyr Bîff y Flwyddyn y Farmers Weekly ar gyfer 2017, sy’n dweud mai meincnodi a sylw at fanylder sydd wrth wraidd eu llwyddiant.

Mewn ymgais i sicrhau bod pob ffermwr yn cael eu hannog i fanteisio ar y gefnogaeth sydd ar gael er mwyn sicrhau bod eu busnesau’n perfformio ar eu gorau wrth i’r diwydiant baratoi ar gyfer ymadawiad Prydain o’r UE, dyma fydd y brif neges fydd yn cael ei rannu gan Cyswllt Ffermio gyda ffermwyr yn ystod y Ffair Aeaf yn Llanelwedd eleni (Tachwedd 27/28).

“Mae meincnodi wedi cynorthwyo’r teulu Williams i asesu eu cryfderau presennol ac adnabod meysydd i’w gwella, ac erbyn hyn, maent yn perfformio o fewn y traean uchaf ar gyfer cynhyrchiant gwartheg sugno ar eu fferm 320 erw,” meddai Eirwen Williams, cyfarwyddwr rhaglenni gwledig Menter a Busnes, sy’n darparu rhaglen Cyswllt Ffermio.  Ariennir y rhaglen gan Lywodraeth Cymru a Chronfa Amaethyddol Ewrop ar gyfer Datblygu Gwledig. 

Bydd cynrychiolwyr Cyswllt Ffermio ar gael mewn lleoliadau gan gynnwys y balconi ar lawr cyntaf yr adeilad da byw; adeilad Lantra (Rhodfa K); gyda Coed Cymru lle byddwn yn annog ymwelwyr i ddarganfod sut i ddiogelu ac ehangu coetiroedd brodorol ac ynghyd â Llywodraeth Cymru yn Neuadd De Morgannwg.

Bydd staff Cyswllt Ffermio yn hyrwyddo pob agwedd o’r gwasanaeth trwy gydol y digwyddiad deuddydd, ond bydd y pwyslais eleni ar ddiogelwch fferm ac yn bennaf, gweithio gydag anifeiliaid, sydd wedi achosi nifer o farwolaethau a damweiniau difrifol ledled y DU dros y blynyddoedd diwethaf. 

Er mwyn cynorthwyo i godi ymwybyddiaeth o beryglon gweithio gydag anifeiliaid a lleihau’r perygl o anafiadau a damweiniau, bydd Partneriaeth Diogelwch Fferm Cymru (WFSP) gyda chefnogaeth Cyswllt Ffermio, yn cynnal pedwar Gweithdy Trin Gwartheg yn Ddiogel yn ddyddiol yn ystod y Ffair Aeaf (dydd Llun a dydd Mawrth am 10.30yb, 11.30yb, 1.30yp a 2.30yp). Lleolir y gweithdai ger adeilad Lantra, a bydd ymwelwyr â’r ffair yn cael gwahoddiad i fynychu un o’r gweithdai ugain munud o hyd i ddysgu mwy am sut i drin gwartheg yn ddiogel er mwyn osgoi anaf i’r anifail, ac yn bwysicaf oll, i fodau dynol. 

“Bydd hwn yn gyfle gwych i ddysgu technegau newydd yn ymwneud â thrin gwartheg, a fydd yn cynorthwyo i leihau’r perygl o anafiadau neu ddamweiniau diangen, felly rydym yn eich annog i alw heibio - gallai’r gweithdy ugain munud o hyd arbed eich bywyd chi neu aelod o’r teulu!” meddai Mrs Williams.

Bydd Cyswllt Ffermio hefyd yn canolbwyntio ar ddatblygiad personol trwy’r rhaglen sgiliau a mentora, ac yn benodol yn amlygu manteision modiwlau e-ddysgu amaethyddol perthnasol, sydd ar gael am ddim, yn hawdd cael mynediad atynt ar eich gliniadur, ac yn addysgiadol iawn.

“Bellach, mae cymaint o ffermwyr yn darganfod bod llawer iawn o wybodaeth ar gael trwy ymweld â gwefan Cyswllt Ffermio.

“Cyn belled â’u bod wedi cofrestru gyda ni a’u bod wedi derbyn eu henw defnyddiwr a chyfrinair unigol gan Ganolfan Wasanaeth Cyswllt Ffermio, maent yn barod i ddechrau adeiladu ar eu gwybodaeth yn ymwneud ag amrywiaeth o bynciau ar-lein, gan gynnwys iechyd anifeiliaid, rheolaeth tir a sgiliau busnes,” meddai Mrs. Williams