18 Chwefror 2019
Mae Susie a’i phartner bellach yn ffermio daliad bîff a defaid yn Jeffreyston ger Cilgeti, lle cafodd ei geni a’i magu.
Mae’r cwpwl yn cadw oddeutu 100 o wartheg bîff i’w pesgi, gan gynnwys nifer ar y cynllun Aberdeen Angus, ac am y tro cyntaf eleni, mae ganddyn nhw fuches fechan o wartheg sugno y maen nhw’n gobeithio ei ehangu. Maen nhw hefyd wedi sefydlu diadell fechan o ddefaid Llanwenog, ac mae eu plant, Iwan (6) a Mari (4) wedi mwynhau eu dangos mewn sioeau lleol dros yr haf.
Wedi iddi adael yr ysgol, cwblhaodd Susie ddiploma cenedlaethol mewn amaethyddiaeth yng Ngholeg Sir Gâr ar gampws Gelli Aur. Yn fuan wedi hynny, ymunodd ag Undeb Amaethwyr Cymru, lle bu’n gweithio am 13 mlynedd fel swyddog rhanbarthol ar gyfer De Sir Benfro.
Bu Susie yn ysgrifenyddes rhan amser ar gyfer sioe amaethyddol Martletwy am wyth mlynedd, ac mae’n dal i gymryd rhan gyda’r CFfI lleol fel aelod o’r pwyllgor cynghori.
Mae Susie yn gobeithio y bydd ei phrofiad ymarferol o ffermio, ynghyd â’i hagwedd penderfynol tuag at ddatblygu busnes teuluol proffidiol a chynaliadwy, yn ei gwneud yn llysgennad brwd o ran hybu gwasanaethau a digwyddiadau Cyswllt Ffermio.
“Ar ôl dechrau’r swydd newydd hon yn ystod cyfnod ansicr iawn i’n diwydiant, byddaf yn awyddus iawn i gyfeirio ffermwyr at y nifer o wasanaethau a phrosiectau sydd ar gael.”
Mae Susie yn gefnogwr brwd o feincnodi, ac mae hi a’i phartner yn benderfynol o ganolbwyntio ar feincnodi elfen besgi eu stoc.
“Mae’n hanfodol i ffermwyr wybod tuag at beth maen nhw’n anelu, felly byddaf yn annog busnesau i fanteisio ar gefnogaeth Cyswllt Ffermio ar gyfer meincnodi, i’w cynorthwyo i gymharu eu ffeithiau a’u ffigyrau gyda busnesau bychain eraill o fewn yr un sector er mwyn canfod meysydd i’w gwella,” meddai Susie.
Mae De Sir Benfro yn ardal llawn amrywiaeth, gyda chyfuniad da o ffermio llaeth, bîff a defaid, ond mae’r lleoliad arfordirol a’r hinsawdd hefyd yn denu nifer o fentrau twristiaeth a garddwriaeth.
“Mae gan Cyswllt Ffermio rywbeth i’w gynnig i bob sector o ffermio ac amaethyddiaeth, gan gynnwys digwyddiadau ar arallgyfeirio a chynllunio technegol, yn ogystal â phrosiectau arbenigol sy’n gallu helpu ffermwyr i wella ar eu datblygiad personol a busnes.
“Byddaf yn annog busnesau i ganfod beth sydd ar gael ar eu cyfer er mwyn eu cynorthwyo i fod yn fwy proffidiol, a fydd yn arwain y diwydiant yng Nghymru yn ei flaen yn y pen draw.”
Gyda’r cyfnod ymgeisio presennol ar gyfer sgiliau Cyswllt Ffermio bellach ar agor tan 1 Mawrth, mae Susie yn annog unrhyw un sy’n ystyried ymgeisio am gyllid hyd at 80% ar gyfer gwella eu busnes neu hyfforddiant ymarferol i gysylltu â hi. Mae hi hefyd yn awyddus i hybu’r gweithdai iechyd anifeiliaid a’r hyfforddiant TGCh wedi’i ariannu’n llawn.
Mae Susie yn ymweld â marchnad da byw Hwlffordd yn rheolaidd, ac mae hefyd yn rheoli pum grŵp trafod ar bynciau penodol ar gyfer ffermwr defaid a llaeth, a’r rhai sy’n canolbwyntio ar stoc ifanc.
Er mwyn cysylltu â Susie a chanfod mwy ynglŷn â sut all Cyswllt Ffermio fod o fudd i chi a’ch busnes, cliciwch yma neu ffoniwch Susie ar 07867 908193.