14 Gorffennaf 2021
Mae digwyddiadau byw Cyswllt Ffermio wedi ailddechrau a chynhaliwyd y cyntaf o’r rhain mewn gardd fasnachol yn Aberteifi ym mis Gorffennaf.
Aeth bron i 18 mis heibio ers i’r pandemig orfodi Cyswllt Ffermio i fynd â’i ddigwyddiadau trosglwyddo gwybodaeth ar-lein.
Ond, gyda chanllawiau Covid-19 Llywodraeth Cymru yn awr yn caniatáu digwyddiadau tu allan trwy gadw pellter cymdeithasol, mae Cyswllt Ffermio yn ailgychwyn ei ddigwyddiadau ar safleoedd unwaith eto.
Cychwynnodd y rhain gyda digwyddiad agored ar safle Gardd Fasnachol Glebelands, Aberteifi, i drafod dulliau rheoli chwyn.
Mae nifer o ddigwyddiadau wedi eu trefnu yn barod ar draws Cymru ar gyfer yr wythnosau nesaf ac mae’r calendr digwyddiadau yn cael ei ddiweddaru’n gyson wrth i ragor gael eu hychwanegu.
Rhoddodd Eirwen Williams, cyfarwyddwr rhaglenni gwledig Menter a Busnes, sy’n darparu rhaglen Cyswllt Ffermio, anogaeth i ffermwyr a thyfwyr ymweld â gwefan Cyswllt Ffermio i wirio pa ddigwyddiadau sy’n dod ar llyw.cymru/cyswlltffermiodigwyddiadau.
Roedd y ffurf gweminar a’r digwyddiadau byw o ffermydd arddangos wedi bod yn boblogaidd iawn yn ystod y cyfnodau clo Covid-19 a thra bu’r cyfyngiadau ar gyswllt cymdeithasol yn eu lle, dywedodd.
Felly bydd y rhaglen wrth symud ymlaen yn cynnwys cymysgedd o ddigwyddiadau ar y safle ac ar-lein.
“Gwyddom bod pobl wedi gweld colli’r digwyddiadau ar safleoedd a’r cyfle i ddysgu o’n prosiectau a’n gwaith treialu mewn lleoliad byw, felly rydym yn falch iawn ein bod ni mewn sefyllfa erbyn hyn i gynnig y cyfle hwnnw eto,” dywedodd Mrs Williams.
Cynhelir yr holl ddigwyddiadau ar safleoedd yn unol â’r canllawiau Covid-19 presennol, ac mae archebu lle yn orfodol, ychwanegodd.
Mae Cyswllt Ffermio, sy’n cael ei ddarparu gan Menter a Busnes a Lantra, yn cael ei gyllido drwy Cymunedau Gwledig Llywodraeth Cymru - Rhaglen Datblygu Gwledig Cymru 2014-2020, a ariennir gan Lywodraeth Cymru a’r Gronfa Amaethyddol Ewrop ar gyfer Datblygu Gwledig.