Prosiect Safle Arddangos - Marian Mawr

Arweinyddiaeth a Rheolaeth

Nodau’r Prosiect:

Ar fferm Marian Mawr, mae Aled yn rheoli 3 aelod o staff llawn amser a 4 aelod o staff rhan amser. Er mwyn sicrhau bod y staff yn aros a’u bod yn cael eu cymell, mae Aled yn awyddus i weithredu prosiect rheolaeth i gefnogi ac i wella ei sgiliau arweinyddiaeth a rheolaeth a hefyd i gynyddu ymrwymiad ei staff i’r busnes.

Amcanion strategol:

Bydd y prosiect yn cefnogi’r nodau strategol yma drwy hyfforddi rheolwyr fferm
Darparu’r adnoddau i reoli eu tîm yn fwy effeithiol er mwyn cyflawni nodau busnes
Bydd y prosiect hefyd yn anelu at ddatblygu unigolion o fewn y tîm i ddod yn arweinwyr yn y busnes
Mae’r prosiect yn anelu at ddatgloi eu potensial drwy gynyddu hyder.

Nodweddion ymarferol y prosiect:

Ar ddechrau’r prosiect, cynhelir trosolwg 360̊ o’r tîm yn ei gyfanrwydd er mwyn canfod bodlonrwydd.
Bydd yr adolygiad yn cael ei ailadrodd ymhen 12 mis er mwyn canfod unrhyw welliannau (neu beidio) yn dilyn gweithredu strwythurau rheolaeth.
Cynhelir cyfarfodydd gyda holl aelodau’r tîm, ac os bydd angen, cynhelir cyfarfodydd unigol er mwyn sicrhau cyfrinachedd i drafod unrhyw faterion sensitif.
Darperir cefnogaeth barhaus i Aled a phob aelod staff yn ystod y flwyddyn er mwyn sicrhau gwelliant parhaus ac awgrymiadau ynglŷn â sut i drechu materion sy’n codi.

Diweddariad y Prosiect:

Cyhoeddiad Technegol (Rhifyn 8, tudalen 8): Prosiect Arweinyddiaeth a rheolaeth staff Cyswllt Ffermio

Erthygl: Rheolaeth staff - denu a chadw pobl da

Defnyddio Detholiad Genomeg i Wella Effeithlonrwydd Magu Lloi

Nodau'r Prosiect:

Defnyddio profion genomig i ddewis yr anifeiliaid mwyaf cynhyrchiol a phroffidiol o’r fuches er mwyn magu. Yna gellir gwerthu anifeiliaid llai cynhyrchiol gan waredu’r costau diangen ar gyfer magu, a gwella geneteg a pherfformiad y fuches laeth yn ei dro.

Amcanion strategol:

Gwella cynhyrchiant a rheolaeth costau
Gwella cynhyrchiant anifail trwy gydol ei hoes
Atgyfnerthu’r busnes
Diogelu enw da’r diwydiant llaeth
Annog arloesedd a gwella cynhyrchiant cynradd ar fferm ac o fewn y gadwyn gyflenwi

Y prosiect ar waith:

Unwaith y byddant wedi’u cofrestru, bydd 70 llo Holstein benyw pur yn cael prawf genomig. Bydd rhic maint nodwydd yn cael ei dynnu o’r glust a bydd samplau genomig yn cael eu cymryd a’u hanfon at labordy genoteipio.
Unwaith y bydd y genoteip wedi cael ei gynhyrchu, bydd yn cael ei anfon at y Ganolfan Werthuso Geneteg i edrych ar nodweddion cynhyrchiant, iechyd, ffitrwydd a ffrwythlondeb.
Bydd yr adnodd cyfrifo costau magu heffrod yn cofnodi costau manwl ar gyfer dwysfwyd, meddyginiaeth, gwellt, deunydd sych, costau milfeddygol, pwysau lloi a chynnydd pwysau byw. Bydd yn cael ei ddefnyddio’n flynyddol er mwyn cymharu ac adnabod costau magu ar gyfer y stoc ifanc.

Diweddariad ar y prosiect:

Mae data GEBV ar gyfer y lloi cyntaf bellach wedi cael eu creu. Mae’r gyfres nesaf o loi yn cael eu profi a’u pwyso ym mis Medi a Hydref.
Unwaith y bydd y profion wedi bod ar waith am chwe mis, bydd penderfyniad rheolaeth yn cael ei wneud ynglŷn â pha anifeiliaid i’w cadw fel anifeiliaid cyfnewid. Mae’n bosib y bydd lloi gyda chanlyniadau genomig gwael yn cael eu gwerthu.

Gall cynhyrchwyr llaeth sydd wedi cynnal profion genomig ar eu heffrod bellach ddefnyddio 3 mynegai gwahanol i helpu i wneud penderfyniadau deallus ynglŷn â chenhedlu i fridio anifeiliaid cyfnewid. Yn unol â systemau strategol gorau posibl AHDB, mae mynegai Lloia’r Hydref £ACI) wedi cael ei gyflwyno yn ystod y mis Awst hwn ynghyd a’r Mynegai Proffidioldeb Oes (£PLI) presennol a’r Mynegai Lloia’r Gwanwyn (£SCI). Mae bellach yn bosibl dewis teirw a bridio gwartheg sy’n fwy addas ar gyfer cytundeb llaeth, patrwm lloia neu drefn fwydo presennol. Mae Marian Mawr, un o Ffermydd Arddangos Cyswllt Ffermio, yn cynhyrchu llaeth drwy gydol y flwyddyn, ac maen nhw wedi bod yn cynnal profion genomig ar heffrod gan ddefnyddio’r £PLI fel sylfaen dros y ddwy flynedd diwethaf ac yn dewis teirw yn seiliedig ar £PLI. Gall cynhyrchwyr tymhorol yng Nghymru sy’n dymuno symud i system lloia mewn bloc wneud defnydd o’u Hadroddiad Genetig unigol am ddim ar wefan AHDB fydd yn cynnwys gwybodaeth ynglŷn â’r gwartheg benyw ar bob un o’r 3 mynegai.

Siart 1. Pwysoliad y Mynegai Lloia’r Hydref (£ACI) newydd