13 Mawrth 2025
Mae Cyswllt Ffermio yn cynnig cyfres o Ddosbarthiadau Meistr; Meistr ar Borfa a MasterRegen, sydd wedi’u cynllunio i wella sgiliau technegol a pherfformiad y busnes i ffermwyr.
Bydd y gweithdai hyn yn darparu cymysgedd o ddysgu ymarferol a gwybodaeth ddamcaniaethol mewn grwpiau bach. Bydd y rhai sy’n cymryd rhan yn cael y cyfle i ddysgu oddi wrth ffermwyr profiadol, arbenigwyr blaenllaw ac ymgynghorwyr. Bydd y ffenestr ymgeisio ar gyfer y Dosbarthiadau Meistr hyn yn agor 17 Mawrth ac yn cau 7 Ebrill, 2025.
Bydd y gweithdy Meistr ar Borfa a gynhelir dros ddau ddiwrnod yn rhoi’r sgiliau sydd eu hangen ar ffermwyr i sicrhau’r rheolaeth gorau posibl ar y borfa, gwella gwytnwch y busnes a gwella proffidioldeb wrth leihau eu hôl-troed carbon.
Bydd y gweithdai’n rhoi sylw i leihau costau mewnbwn, rheoli porfa a defnyddio meddalwedd, cynllunio systemau padog, cyfrifo’r galw am fwyd, defnyddio ffens drydan ac edrych ar systemau dŵr hyblyg.
Bydd Rhys Williams a Sarah Morgan o Precision Grazing Ltd yn arwain y gweithdai Meistr ar Borfa, gan rannu eu harbenigedd mewn systemau pori a rheoli’r borfa.
"System rheoli pori da yw sylfaen busnes fferm proffidiol, gwydn. Bydd y gweithdai Meistr ar Borfa yn rhoi'r sgiliau ymarferol a'r hyder i ffermwyr wneud gwell defnydd o'u porfa, lleihau costau, a gwella effeithlonrwydd. Mae dysgu gan arbenigwyr blaenllaw a ffermwyr profiadol mewn lleoliad ymarferol yn gwneud hwn yn gyfle gwych i unrhyw un sydd am fynd â'u pori i'r lefel nesaf," meddai Rhys Williams.
Bydd 3 gweithdy Meistr ar Borfa’n cael eu cynnal ledled Cymru (Gogledd, Canolbarth a’r De) ar 6-7 Mai, 8-9 Mai a 12-13 Mehefin, 2025. Bydd y lleoliadau’n cael eu cadarnhau ar ôl i’r ceisiadau gael eu hasesu.
Gweithdy rhagarweiniol yw’r MasterRegen i ffermwyr ddysgu egwyddorion ffermio da byw adfywiol. Mae’n canolbwyntio ar systemau proffidiol sy’n cyflawni manteision ariannol ac amgylcheddol.
Bydd y gweithdy hwn yn cynnwys gwella iechyd y pridd, datblygu mentrau da byw mewnbwn isel, dewis geneteg da byw addas, cyfrifo cyfraddau stocio a chreu modelau busnes cynaliadwy.
Bydd James Daniel, o Precision Grazing Ltd, yn dysgu’r gweithdy MasterRegen, gan rannu ei wybodaeth am bori adfywiol a rheoli busnes y fferm.
"Mae'r Dosbarthiadau Meistr hyn yn ymwneud â dysgu ymarferol y gall ffermwyr ei roi ar waith ar unwaith. Maent yn cynnig cyfle gwerthfawr i gamu'n ôl o'r llwyth gwaith dyddiol a chanolbwyntio ar weithio ar y busnes, nid ynddo yn unig. Gyda grwpiau bach, digon o drafod, ac arweiniad arbenigol, bydd ffermwyr yn magu hyder mewn sgiliau newydd, yn cyfnewid syniadau â chymheiriaid o'r un anian, ac yn gadael gydag atebion ymarferol y gallant eu rhoi ar waith ar unwaith," meddai James Daniel.
Bydd y gweithdy MasterRegen yn cael ei gynnal ar 12-13 Mehefin, 2025, gyda’r lleoliad i’w gadarnhau ar ôl i’r ffenestr ymgeisio gau.
Am ragor o wybodaeth neu i wneud cais am Ddosbarth Meistr Cyswllt Ffermio gwasgwch yma