18 Gorffennaf 2024
“Mae paru tirfeddianwyr sydd am neu angen camu’n ôl o’r diwydiant gyda ffermwyr iau neu newydd-ddyfodiaid sy’n awyddus i gael troed i mewn yn y byd amaeth nid yn unig yn grymuso a moderneiddio amaethyddiaeth Cymru ond hefyd yn diogelu dyfodol llawer o fusnesau fferm sydd mewn perygl,” meddai Euryn Jones, cadeirydd Bwrdd Cynghori Strategol Cyswllt Ffermio.
Bydd Mr Jones yn cadeirio digwyddiad ‘Dechrau Ffermio’ arbennig ar fentrau ar y cyd yn Sioe Frenhinol Cymru, Llanelwedd eleni (Gorffennaf 22-25), pan fydd Ysgrifennydd Cabinet Llywodraeth Cymru dros Newid Hinsawdd a Materion Gwledig, Huw Irranca-Davies, yn ymuno â chynulleidfa wadd o unigolion o Gymru sy’n chwilio am gyfleoedd a thirfeddianwyr sydd ar hyn o bryd wedi cofrestru ar gronfa ddata 'Dechrau Ffermio' Cyswllt Ffermio, gyda phob un yn gobeithio dod o hyd i bartner busnes priodol. Bydd cyn-fuddiolwyr y cynllun a gafodd gymorth drwy'r rhaglen ac sydd bellach yn ffermio’n gydweithredol fel rhan o fenter ar y cyd yn ymuno â nhw. Bydd cynrychiolwyr o sefydliadau rhanddeiliaid allweddol y diwydiant hefyd yn bresennol.
Mae menter 'Dechrau Ffermio' wedi darparu cymorth mentora, busnes, ariannol a chyfreithiol wedi'i ariannu'n llawn i 78 partneriaeth menter ar y cyd newydd a llwyddiannus ledled Cymru, gan gynrychioli pob sector o'r diwydiant.
Mae 29 pâr ychwanegol o ddarparwyr a cheiswyr ar eu llwybrau personol eu hunain ar hyn o bryd tuag at fentrau ar y cyd newydd neu bartneriaethau ffermio cyfran. Gyda chymorth mentoriaid cymeradwy ac ymgynghorwyr arbenigol, mae'r gyfran nesaf o ddarpar bartneriaid eisoes yn datblygu cynlluniau busnes a fframweithiau cyfreithiol yn barod ar gyfer eu trefniadau busnes unigryw eu hunain.
Er mwyn datblygu busnesau sydd wedi sefydlu, eglura Mr Jones ei bod yn hanfodol cadw ar y blaen â'r arferion gorau, defnyddio technolegau newydd a rhoi ffyrdd arloesol, cynaliadwy o weithio ar waith. Mae’r rhain i gyd yn feysydd a all gyflwyno heriau i ffermwyr mwy traddodiadol, yn enwedig os nad oes cynllun olyniaeth ar waith i drosglwyddo’r awenau i’r genhedlaeth nesaf.
“Mae Cyswllt Ffermio, trwy ei Raglen Trosglwyddo Gwybodaeth, yn canolbwyntio’n gryf ar annog a galluogi ffermwyr iau i fuddsoddi mewn datblygiad personol ac i fod yn rhan o’r gwaith rheoli’r fferm yn ifanc, boed hynny o fewn fferm deuluol neu bartneriaeth newydd, tra bod eu brwdfrydedd, gallu ac egni ar eu hanterth,” meddai Mr Jones.
Bydd gwasanaethau cymorth y fenter ar y cyd 'Dechrau Ffermio' yn cael eu darparu gan dîm cymeradwy o ymgynghorwyr arbenigol a thimau cyfreithiol Cyswllt Ffermio i fodloni gofynion tirfeddianwyr a darpar ddeiliaid. Nod y fenter yw hwyluso trosglwyddiad di-dor o sgiliau, gwybodaeth ac arbenigedd tirfeddianwyr hŷn neu fwy profiadol i unigolion sydd â’r gallu, y sgiliau a’r egni i sicrhau bod y fferm yn datblygu’n gynaliadwy.
Yn ystod ymweliad Ysgrifennydd y Cabinet â’r digwyddiad ‘Dechrau Ffermio’, bydd yn clywed yn uniongyrchol am y buddion ‘cadarnhaol’ a brofwyd gan nifer o ffermwyr sydd eisoes yn ymwneud â threfniadau ffermio cyfran lwyddiannus yng Nghymru. Wrth siarad cyn Sioe Frenhinol Cymru, dywedodd Ysgrifennydd y Cabinet, Huw Irranca-Davies: “Mae sicrhau bod gwybodaeth ac arbenigedd ffermwyr mwy profiadol yn cael eu trosglwyddo i newydd-ddyfodiaid yn hynod o bwysig. Mae dod â’r arbenigedd, y profiad a’r mewnwelediad hwn ynghyd â’r fenter ‘Dechrau Ffermio’ yn allweddol i ffyniant amaethyddiaeth Cymru yn y dyfodol.
Bydd Llywodraeth Cymru yn parhau i weithio gyda Cyswllt Ffermio i ddarparu diwydiant ffermio sy’n cefnogi cymunedau gwledig ffyniannus – ac sy’n gynaliadwy ym mhob ystyr y gair.”