Mae’r Fforwm Labordy Amaeth ar hyn o bryd yn chwilio am aelodau sydd â phrofiad neu ddiddordeb mewn technoleg newydd sy’n gallu adnabod ac adolygu technoleg ac arferion arloesol. Bydd yn cael ei arwain gan Geraint Hughes, Arweinydd Agrisgôp Cyswllt Ffermio, a ddywedodd:
“Rydym ni eisiau clywed gan bobl sydd â diddordeb brwd mewn ffermio a choedwigaeth yng Nghymru ac sy’n gallu adnabod cyfleoedd i fanteisio ar dechnoleg newydd a fydd o fantais uniongyrchol i fusnesau ffermio a choedwigaeth.” “Ein diddordeb pennaf yw arloesedd newydd sy’n agos ar ddod yn hyfyw’n fasnachol a fyddai’n gallu cynnig mantais sylweddol i ffermwyr a choedwigwyr wrth redeg eu busnesau. Rwy’n disgwyl i’r Labordy Amaeth gynnig cyfle gwych i aelodau ddysgu gan ei gilydd ynglŷn â thechnoleg flaengar.”
Bydd aelodau’r Labordy Amaeth yn cwrdd o leiaf dwywaith y flwyddyn ac yn ymgymryd â gweithgareddau i adnabod cyfleoedd arloesedd a thechnoleg allweddol. Bydd Cyswllt Ffermio yn cefnogi gwaith y Labordy Amaeth trwy rannu gwybodaeth am eu canfyddiadau gyda’r diwydiant ac arddangos arloesedd mewn sefyllfaoedd ymarferol trwy rwydwaith safleoedd arddangos newydd Cyswllt Ffermio.
Ychwanegodd Mr Hughes: “Bydd ardal amlwg yn cael ei neilltuo yn Sioe Frenhinol Cymru eleni ar gyfer y Labordy Amaeth i arddangos detholiad o arloesedd i’r cyhoedd ffermio a choedwigaeth ehangach. Rwy’n edrych ymlaen yn fawr i weld pa fath o dechnoleg newydd y bydd aelodau’n awyddus i’w arddangos ac i ddarganfod sut all y diwydiant ddisgwyl elwa.”
Os oes gennych chi ddiddordeb mewn bod yn aelod o’r Labordy Amaeth, cysylltwch â Geraint Hughes trwy e-bostio geraint.hughes@agrisgop.cymru. Bydd angen i aelodau’r fforwm gofrestru gyda Cyswllt Ffermio.