Mae’r Ysgrifennydd Cabinet newydd dros yr Amgylchedd a Materion Gwledig wedi cael clywed drosti'i hun sut mae Cyswllt Ffermio yn cynorthwyo i hyrwyddo arfer dda ac arloesedd mewn amaethyddiaeth a choedwigaeth.
Bu Lesley Griffiths yn cwrdd ag aelodau o Rwydwaith Arddangos Cyswllt Ffermio yn Sioe Frenhinol Cymru, lle cafodd glywed am y prosiectau a’r gwaith ymchwil sy'n cael eu cynnal ar draws y rhwydwaith dair haen o safleoedd arddangos, arloesedd a ffocws.
Pwysleisiodd yr Athro Wynne Jones, cadeirydd Bwrdd Cynghori Strategol Cyswllt Ffermio, y rôl bwysig y mae'r rhwydwaith arddangos yn ei chwarae o ran rhannu syniadau a fyddai’n gallu cynorthwyo i wella effeithlonrwydd a phroffidioldeb mewn amaethyddiaeth a choedwigaeth.
“Mae’r rhwydwaith yn galluogi gwaith ymchwil a datblygiad i gael ei drosi ar lefel llawr gwlad ac felly mae pethau’n digwydd o safbwynt economaidd a busnes y gall ffermwyr uniaethu a hwy," meddai'r Athro Jones. “Mae’r trosglwyddo gwybodaeth sy’n digwydd ar bob lefel yn bwysig iawn ac yn ffordd dda o rannu ymchwil gyda’r diwydiannau ffermio a choedwigaeth ehangach.”
Bu'r Ysgrifennydd Cabinet yn cwrdd â rhai o ffermwyr o'r 12 safle arddangos sy'n cynnwys ffermydd traws-sector ledled Cymru sy’n cynnal prosiectau a threialon sy’n gweithredu ac yn arddangos arloesedd a thechnoleg newydd i’r diwydiant. Bu hefyd yn clywed am ychydig o’r gwaith sy’n cael ei wneud ar yr wyth safle arloesedd a leolir mewn sefydliadau addysg ac ymchwil amaethyddol yng Nghymru sy’n cynnal prosiectau blaengar o ran ymchwil a datblygiad mewn ffermio a choedwigaeth. Bydd y safleoedd ffocws yn cynnal prosiectau unigol sy’n rhoi technoleg a syniadau ar waith mewn sefyllfa ymarferol ar y fferm.
Dywedodd Dewi Hughes, Rheolwr Datblygu Technegol Cyswllt Ffermio: “Rydym yn gweithio gyda nifer o ffermwyr eithriadol o flaengar ac arloesol a trwy’r rhwydwaith gallwn dreialu ac arddangos technegau a thechnoleg newydd a fydd o fudd i’r diwydiant. Bydd gweithio gyda chyrff addysgol hefyd yn helpu i gyfleu'r ymchwil ac arloesedd diweddaraf i gynulleidfa ehangach ac yn galluogi datblygiad prosiectau pellach a ellir cael eu gweithredu ar fferm.”
Am fwy o wybodaeth ynglŷn â rhwydwaith arddangos Cyswllt Ffermio cliciwch yma.