22 Ionawr2019
Mae ymgyrch recriwtio Cyswllt Ffermio ar gyfer ymgeiswyr Academi Amaeth 2019 wedi cychwyn yn ffurfiol heddiw, Ionawr 22.
Lansiwyd Lesley Griffiths, Gweinidog yr Amgylchedd, Ynni a Materion Gwledig, yn lansio rhaglen ddatblygiad personol bwysig Cyswllt Ffermio yn swyddogol, Academi Amaeth 2019, pan fydd yn mynd i frecwast blynyddol Undeb Amaethwyr Cymru yn Adeilad y Pierhead, Bae Caerdydd ar ddydd Mawrth, 22 Ionawr.
Mae’r Academi Amaeth, sydd yn agosáu at ei seithfed flwyddyn a gyda 200 o alumni, yn dwyn at ei gilydd rai o’r bobl fwyaf addawol sy’n datblygu eu gyrfa yn y diwydiant amaeth yng Nghymru heddiw, gan roi’r ysbrydoliaeth, hyder, sgiliau a chysylltiadau y mae arnynt eu hangen i ddod yn arweinwyr gwledig, pobl fusnes broffesiynol, arloeswyr ac entrepreneuriaid.
Yn cynnwys tair elfen benodol, mae rhaglen Arweinyddiaeth Wledig yr Academi Amaeth, ar y cyd â Chymdeithas Frenhinol Amaethyddol Cymru, yn anelu at ddatblygu a meithrin cenhedlaeth newydd o arweinwyr. Mae’r rhaglen Busnes ac Arloesedd yn cynnig cyfle datblygu personol a busnes i helpu i wynebu sialensiau ffermio yn y dyfodol, tra Rhaglen yr Ifanc, a redir mewn partneriaeth â CFfI Cymru, wedi ei dargedu ar bobl ifanc 16-19 oed sy’n ystyried gyrfa yn y diwydiannau bwyd a ffermio.
Dywedodd y Gweinidog Amgylchedd, Ynni a Materion Gwledig, a ddaeth i’r derbyniad arbennig yn y Ffair Aeaf llynedd, oedd yn cael ei westeio gan raddedigion o’r tair elfen o’r rhaglen:
“Mae gan yr Academi Amaeth hanes rhagorol o baratoi’r ffordd ar gyfer llwyddiant mewn busnes a gyrfa i gymaint o’r alumni.
“Mae’r unigolion yma, a ddewiswyd oherwydd eu hangerdd, ffocws ac ymrwymiad i faterion gwledig yng Nghymru, yn sicr yn ad-dalu ein buddsoddiad yn eu datblygiad personol, y gellir ei dadogi ar gyfuniad unigryw’r Academi Amaeth o fentora, hyfforddi, rhwydweithio ar lefel uchel wedi ei dargedu a theithiau astudio yng Nghymru ac Ewrop.
“Mae llawer ohonynt yn awr yn helpu yn weithredol i wthio materion gwledig yn eu blaenau yng Nghymru, gan sicrhau bod eu lleisiau yn cael eu clywed a’u barn yn hysbys. Gyda Brexit yn nesáu mae’n bwysicach nag erioed i ni gefnogi ein diwydiant amaeth ym mhob ffordd y gallwn ni. Bydd Cyswllt Ffermio yn allweddol wrth sicrhau bod y rhai sydd yn y diwydiant yn cael pob offeryn posibl i fod yn llwyddiannus yn y sialensiau y maent yn eu hwynebu.”
Mae’r Academi Amaeth yn denu nifer gynyddol o geisiadau o flwyddyn i flwyddyn. Wedi eu tynnu o amrywiaeth eang o sectorau amaethyddol, mae’r graddedigion yn cynnwys ffermwyr, coedwigwyr a garddwyr yn ogystal â nifer o unigolion yn cynrychioli’r proffesiynau gan gynnwys milfeddygon, meddygon, syrfewyr, cynllunwyr a chyfreithwyr sy’n gweithio mewn cymunedau gwledig.
Bydd y cyfnod ymgeisio ar gyfer Academi Amaeth 2019 yn agor ar 22 Ionawr ac yn cau ar 31 Mawrth. Er mwyn bod yn gymwys rhaid bod yn bartneriaid busnes, aelodau o deulu agos (priod, meibion a merched) a gweithwyr (ar PAYE) busnesau sydd wedi eu cofrestru â Cyswllt Ffermio.
Ariennir Cyswllt Ffermio gan Lywodraeth Cymru a’r Gronfa Amaethyddol Ewropeaidd ar gyfer Datblygu Gwledig.