Cwmnïau yn cynnal eu taith datblygu masnach gyntaf bwyd a diod i’r Ffindir a Sweden
Mae un ar bymtheg o gwmnïau bwyd a diod o Gymru yn paratoi i hedfan i’r Ffindir a Sweden er mwyn ceisio datblygu cysylltiadau masnachu newydd ac ehangu yn y marchnadoedd hyn. Gyda chefnogaeth Llywodraeth Cymru, dirprwyaeth datblygu masnach Bwyd a Diod Cymru yw’r cyntaf i ymweld â Sgandinafia a chanolbwyntio llwyr ar fwyd a diod.
Yn ôl Rebecca Evans, y Dirprwy Weinidog dros Amaeth a Bwyd, mae hwn yn gam pwysig arall i dyfu’r diwydiant yn gynaliadwy,
“Mae ein cynlluniau uchelgeisiol ar gyfer y farchnad bwyd a diod yng Nghymru yn ddigon hysbys ac rydym wrthi’n gyson yn chwilio am ffyrdd newydd i sicrhau bod ein cynnyrch o ansawdd uchel yn cael ei gydnabod a’i werthfawrogi ledled y byd. Rydym wrthi ar hyn o bryd yn cynnal rhaglen o ddigwyddiadau masnach allweddol lle y caiff cwmnïau gefnogaeth i ymweld â marchnadoedd allweddol ac mae’n gyfle amhrisiadwy i ryngweithio’n uniongyrchol gyda phrynwyr a dosbarthwyr.
“Mae’r ymweliad masnach hwn yn ein galluogi i ganolbwyntio ar farchnad benodol, i ddeall eu hanghenion, a bydd yn rhoi golwg amhrisiadwy i’r cwmnïau dan sylw ar sut allant deilwra a phecynnu eu cynhyrchion i’r perwyl hwnnw.”
Mae’r 16 cwmni sy’n ymweld â’r Ffindir a Sweden yn amrywio o gwmnïau llaeth a phobi bisgedi i gwmniau cig a bragu.
Croesodd trosiant Bragdy Mws Piws o Borthmadog £1m yn 2013 ac mae’r sylfaenydd Lawrence Washington yn gweld y daith fasnach hon yn gyfle perffaith i ehangu eu marchnad,
“Mae gwledydd Sgandinafia o ddiddordeb arbennig inni ym Mragdy Mws Piws fel marchnadoedd allforio posib. Mae’r cyfle i gyfarfod â phrynwyr allweddol ac i ddeall sut maen nhw eisiau datblygu eu busnes yn hollbwysig fel y gallwn ymateb i’w hanghenion. Rydw i’n gobeithio hefyd y gallai ein brandio mws fod yn boblogaidd yn y gwledydd hynny.”
Mae Cradocs Savoury Biscuits o Aberhonddu yn gwmni arall sy’n gobeithio elwa o’r daith fel y mae Allie Thomas yn esbonio,
“Cawsom lawer o ymholiadau gan brynwyr o Sgandinafia ac rydym wedi ymateb ac wedi meithrin perthnasoedd cadarnhaol cychwynnol gyda’r prynwyr. Er hynny, nid yw’r gwerthiannau wedi cynyddu fel yr oeddem yn gobeithio ac fe hoffem ddeall pam. Y gobaith yw y bydd y daith fasnach hon yn rhoi’r cyfle inni ddarganfod beth mae angen inni ei wneud i droi’r diddordeb hwn yn bartneriaeth ddosbarthu ehangach o ansawdd.”
Yn ystod yr ymweliad pum niwrnod â Helsinki a Stockholm, sy’n cychwyn ar 21 Medi, bydd y cwmnïau yn cyfarfod darpar brynwyr a dosbarthwyr, ymweld â siopau allweddol ac yn cael cyfle i arddangos eu cynhyrchion.
Mae cwmni surop Clarks yng Nghasnewydd yn arweinydd brand yng ngwledydd Prydain gyda’i surop masarn ac mae’r sylfaenydd Bob Clark yn ei weld yn gyfle perffaith i ehangu,
“Fel cwmni nid ydym yn anghyfarwydd â mynychu ffeiriau masnach o dan faner Bwyd a Diod Cymru, ac agorodd hynny’r drysau i nifer o farchnadoedd newydd. Fodd bynnag, mae’r daith datblygu masnach hon yn mynd â’r profiad hwn i lefel newydd ac mae’n ein galluogi i roi sylw i elfennau allweddol o farchnad fwyd a diod bwysig iawn yn Sgandinafia. Mae’n gyfle gwych i bawb sy’n rhan ohono.”
Mae’r 16 cwmni fel a ganlyn:
- Brecon Brewing Ltd
- Calon Wen
- Cradoc's Savoury Biscuits
- Cwmni Caws Caerfyrddin / Carmarthenshire Cheese Company
- Clarks UK Ltd
- Cwm Farm Charcuterie Ltd
- Glamorgan Brewing Company
- Lizi’s Granola (Good Carb Food)
- Monty’s Brewery
- Patchwork Food Company Ltd
- Purple Moose Brewery Ltd
- Sims Food Ltd – Samosaco
- Snowdonia Cheese Company
- Ultrapharm Ltd
- Wholebake
- Wrexham Lager Beer Co Ltd