5 Chwefror 2020
“Mae treulio amser yn ymweld â busnesau gwledig mewn gwahanol ranbarthau yn ffordd werthfawr i weld arfer gorau ar waith, darganfod ffyrdd newydd o weithio a rhoi hwb o’r newydd i’ch busnes eich hun,” meddai Gwenan Davies un o ffermwyr ifanc CFfI Mydroilyn, a ymunodd â saith aelod arall o’r clwb Hydref diwethaf i fynd ar daith astudio Cyswllt Ffermio am dri diwrnod i’r Alban. Y pwnc dan sylw oedd arallgyfeirio.
Gydag amserlen lawn i gasglu gwybodaeth, bu’r grŵp yn ymweld â nifer fawr o fentrau gwledig oedd wedi arallgyfeirio yn cynnwys cynllun twristiaeth a chanolfan farchogaeth; busnes cigydd a fferm gwartheg a defaid oedd wedi arallgyfeirio i redeg busnes cludiant llwyddiannus. Arhosodd yr aelodau gyda theuluoedd o’r Alban oedd yn gysylltiedig â’u CFfI eu hunain. Ar ddiwedd eu hymweliad, roedd yn glir fod pob un o ffermwyr Ceredigion wedi’u hysbrydoli, dysgwyd nifer o wersi a thrafodwyd a lleisiwyd barn yn agored.
Mae Marged Jones sy’n aelod o CFfI Mydroilyn ac mae ei theulu’n rhedeg fferm laeth a pharc carafanau ger Cei Newydd. Dywedodd Marged fod yr ymweliad wedi rhoi’r hyder i’r grŵp feddwl yn fwy cadarnhaol am eu syniadau a chredu bod unrhyw beth yn bosibl os ydych yn gwneud eich ymchwil ac yn dechrau ar raddfa y gallwch ymdopi â hi. Dydi nifer o fentrau newydd ddim bob amser mor gostus i’w sefydlu, ac nid oes cymaint o risg yn perthyn iddyn nhw ag y mae rhywun yn ei feddwl ar y dechrau.
“Buom yn ymweld ag Ingliston Country Club, sydd mewn llai na 12 mlynedd, trwy gynllun datblygu graddol, wedi mynd o fod yn fferm fach gydag ychydig o stablau dan ofal aelodau’r teulu’n unig, i fusnes gyda 200 o stablau sy’n cyflogi dros 160 o staff,” meddai Marged.
Dywedodd Gwenan fod pawb yn unfrydol bod y daith astudio wedi bod yn gyfle buddiol iawn.
“Erbyn ein bod yn teithio’n ôl i Gymru, roedd ymdeimlad bod pawb wedi cael profiad a gwybodaeth werthfawr iawn, ac rwy’n credu bod pob un ohonom yn benderfynol o weithredu rhywfaint o’r hyn a welwyd ac a ddysgwyd yn ôl gartref.”
Mae tri deg pedwar o ffermwyr a choedwigwyr o Gymru, gyda meysydd diddordeb tra gwahanol, wedi gallu gweld drostyn nhw eu hunain yr hyn sydd wedi gwneud ystod eang o fusnesau gwledig drwy’r DU yn llwyddiannus, diolch i raglen teithiau astudio bresennol Cyswllt Ffermio. Maent yn cynnwys nifer o grwpiau CFfI, cymdeithasau gwartheg a thir glas, aelodau grŵp trafod Cyswllt Ffermio, mentrau cydweithredol llaeth ac eidion a nifer o rai eraill, pob un ohonynt yn benderfynol o ddysgu popeth posibl am y pynciau a ddewiswyd yn seiliedig ar brofiadau mentrau tebyg.
Mae’r cyfnod ymgeisio nesaf ar gyfer teithiau astudio yn dechrau ddydd Sadwrn, 1 Chwefror ac mae’n dod i ben ddydd Gwener, 28 Chwefror. Bydd angen i bob grŵp gyflwyno ffurflen gais, yn cynnwys enw(au) neu fath(au) o fentrau y maent yn dymuno ymweld â nhw cyn y gellir neilltuo arian. Mae disgwyl i bob grŵp gadw cofnod o’i ganfyddiadau i rannu gydag eraill ar ôl dychwelyd.
Pwysleisiodd Sioned Llywelyn, rheolwr datblygu a mentora gyda Menter a Busnes, sy’n darparu Cyswllt Ffermio ar y cyd â Lantra Cymru r ran Llywodraeth Cymru, fanteision dysgu fel grŵp, gydag aelodau’n gallu trafod eu syniadau ar gyfer tyfu busnesau’n rhydd gyda’r rhai y maent yn ymweld â nhw yn ogystal â gyda’i gilydd.
“Ar yr amod eich bod wedi cofrestru fel unigolyn gyda Cyswllt Ffermio a’ch bod yn gallu creu grŵp sy’n cynnwys o leiaf tri unigolyn o’r un meddylfryd i wneud cais grŵp, buaswn yn eich annog i ddechrau ymchwilio i’r math o fusnes yr hoffech ymweld ag ef a chyflwyno eich cais cyn gynted â phosibl.
“Mae hwn yn gyfle gwych i’r rhai sy’n gweithio yn ein diwydiant i weld sut mae arloesedd, technolegau newydd a pharodrwydd i arallgyfeirio’n trawsnewid effeithlonrwydd a phroffidioldeb nifer o fusnesau llwyddiannus drwy’r DU.”
Mae hyd at £3,000 fesul grŵp ar gael i ariannu 50% o gost pob taith astudio. Gallwn ariannu hyd at bedwar diwrnod yn ymweld â mentrau penodol yn unrhyw le yn y DU.
I weld adroddiadau llawn am holl deithiau astudio blaenorol Cyswllt Ffermio ac i lawrlwytho telerau, amodau a ffurflen gais 2020 cliciwch yma.
Os oes angen gwybodaeth bellach arnoch am deithiau astudio Cyswllt Ffermio, cysylltwch â sioned.llywelyn@menterabusnes.co.uk neu ffoniwch 01970 631421.
Mae Cyswllt Ffermio, sy’n cael ei ddarparu gan Menter a Busnes a Lantra, yn cael ei gyllido drwy Cymunedau Gwledig Llywodraeth Cymru - Rhaglen Datblygu Gwledig Cymru 2014-2020, a ariennir gan Lywodraeth Cymru a’r Gronfa Amaethyddol Ewrop ar gyfer Datblygu Gwledig.