29 Mai 2024
Mae merched sy’n gweithio ym myd amaeth ledled Cymru yn cael eu gwahodd i ymuno â Cyswllt Ffermio ar 4 taith o ddarganfod. Byddan nhw’n cael golwg mewnol ar rai o fusnesau gwledig mwyaf llwyddiannus Cymru, gan glywed yn uniongyrchol gan yr entrepreneuriaid a'r teuluoedd ffermio sydd â'u straeon ysbrydoledig eu hunain i'w hadrodd.
Bydd y teithiau Merched mewn Amaeth yn cael eu cynnal ddydd Mercher, 19 Mehefin, 8:30am – 6:00pm.
Byddwch yn ymweld â rhai o’r busnesau a ffermydd gwledig mwyaf llwyddiannus, ac yn clywed straeon ysbrydoledig yn uniongyrchol gan yr entrepreneuriaid a’r teuluoedd ffermio sy’n eu rhedeg.
Bydd teithiau Gogledd Cymru’n cynnwys ymweliad â fferm deuluol ger Pentrefoelas sy'n rhedeg caffi a busnes glampio; fferm draddodiadol sy'n cynnwys ynni adnewyddadwy, twristiaeth a chynhyrchu dofednod, a gwinllan sy'n cynhyrchu gwinoedd llonydd a phefriog arobryn.
Byddwn hefyd yn ymweld â fferm deuluol a maes carafanau ger Rhuthun sydd ar hyn o bryd yn brysur yn adeiladu caffi newydd a fydd yn agor ym mis Gorffennaf, gobeithio.
Bydd teithiau Canolbarth a Gorllewin Cymru’n cynnwys ymweliad â fferm laeth ger Tregaron sy'n gweithredu arferion cynaliadwy ac yn edrych i ddiogelu'r busnes at y dyfodol gyda thechnegau adfywiol, a phrosiect arallgyfeirio rhyfeddol yng nghanol cefn gwlad Aberhonddu.
Byddwn hefyd yn ymweld â busnes fferm sy’n cynnig ysgubor hardd y gellir ei harchebu ar gyfer priodasau, digwyddiadau, cyfarfodydd ac encilion, ac sydd hefyd yn cynnig llety godidog yn ei fythynnod hunanarlwyo.
Ac i'r rhai ohonoch chi sydd yn hoff o jin, byddwn yn ymweld â busnes cynhyrchu jin yn ogystal. Y tu hwnt i jin, mae ganddyn nhw hefyd amrywiaeth o eiddo twristiaeth megis cabanau eco, ysguboriau wedi'u haddasu, a ffermdai traddodiadol Cymreig ar y fferm.
Bydd y teithiau hyn yn brofiad gwych, gan ganiatáu ichi rwydweithio â merched sy’n arweinwyr ysbrydoledig mewn gwahanol feysydd ym myd amaeth a’r bywyd gwledig.
Cewch hefyd gwrdd â’ch Swyddog Datblygu lleol ar hyd y ffordd, a all roi gwybodaeth am ba gymorth sydd ar gael drwy Cyswllt Ffermio i helpu eich busnesau i ffynnu.
Bydd dwy daith fws yng Ngogledd Cymru, un yn y canolbarth, a'r llall yng Ngorllewin Cymru. Bydd teithlen fanwl ar gael ar wefan Cyswllt Ffermio ar gyfer y pedair taith.
Dim ond nifer cyfyngedig o lefydd sydd ar gael, felly cofrestrwch heddiw! I gael rhagor o wybodaeth neu i gofrestru, ewch i wefan Cyswllt Ffermio neu cysylltwch â Chanolfan Wasanaeth Cyswllt Ffermio ar 03456 000 813 neu’r tîm digwyddiadau – fcevents@menterabusnes.co.uk